‘शिवु पाण्डे’ बन्नुअघिको संघर्ष, धेरैलाई थाहा छैन !

नेपाली मनोरञ्जन क्षेत्रमा पछिल्लो समय आफ्नो छुट्टै पहिचान बनाउँदै गरेका कलाकार हुन् शिव पाण्डे, अर्थात् ‘शिवु पाण्डे’। अभिनयसँगै उनको फरक शैली र प्रस्तुतिका कारण उनको चर्चा दिनप्रतिदिन बढिरहेको छ।

रुपन्देहीमा जन्मिएका शिवुका लागि काठमाडौं आएर कलाकारितामा स्थापित हुनु भने सहज यात्रा थिएन। अवसरको खोजीमा काठमाडौं आएका उनले सुरुवाती दिनमा आर्टिस्ट खबर मिडियामा क्यामेराम्यानका रूपमा काम सुरु गरे।

क्यामेरा बोकेर मनोरञ्जन क्षेत्रलाई नजिकबाट नियालिरहेका शिवुले विभिन्न म्युजिक भिडियो, टेलिभिजन सिरियल तथा चलचित्रमा क्यामेरा पर्सन र सहायकका रूपमा काम गर्ने अवसर पाए। यही यात्राका क्रममा उनले कलाकारितालाई पनि नजिकबाट बुझ्ने मौका पाए।

क्यामेरा पछाडिको अनुभव बटुल्दै गर्दा उनको बाटो विस्तारै अभिनयतर्फ मोडियो। पर्दामा देखिन थालेपछि उनको आफ्नै शैली र प्रस्तुतिले दर्शकको ध्यान तान्न थाल्यो।

शिवुले ‘बसन्त’, ‘मन बिनाको धन’ र ‘ज्वाइसाब’ लगायतका चलचित्रसँगै थुप्रै म्युजिक भिडियोमा अभिनय गरिसकेका छन्।

क्यामेरा पछाडिबाट सुरु भएको यात्रा अहिले पर्दाअगाडि पुगेको छ। त्यसैले शिवु पाण्डेको कथा केवल कलाकार बन्ने कथा होइन, अवसर खोज्दै काठमाडौं आएका एक युवाले मनोरञ्जन क्षेत्रमा आफ्नो पहिचान बनाएको यात्राको कथा पनि हो।

‘शिवु पाण्डे’ नामले परिचित उनी अहिले अभिनयसँगै सामाजिक सञ्जालमा समेत चर्चामा छन्।