नेफ्टाका पुर्व अध्यक्ष केसीले लण्डनमा ‘सातौ कलिउड सिनेमा अवार्ड’ गर्ने

चलचित्र प्राविधिक संघका पुर्व अध्यक्ष मनोज केसीको नेतृत्वमा लण्डनमा ‘सातौ कलिउड सिनेमा अवार्ड’ आयोजना हुने भएको छ । शनिबार काठमाण्डौमा पत्रकार सम्मेलनको आयोजना गर्दै अवार्ड केसीले जानकारी दिएका हुन् । संगिक्षा फिल्मस्को आयोजना र लण्डनको थर्ड आइको सहकार्यमा यो अवार्ड लण्डनमा आयोजना हुन लागेको हो । अवार्ड सम्भवतः अंग्रेजी मे महिनामा हुन सक्छ ।

कार्यक्रममा बोल्दै संगिक्षा फिल्मस्का प्रमुख मनोज केसीले नेपाली चलचित्रको विकास र विस्तारका लागि अवार्ड गर्न लागेको बताए । नेफ्टामा आफु आएपछि ‘कलिउड सिनेमा अवार्डको श्रृङ्खलालाई रोकेर ‘नेफ्टा अवार्ड’ आयोजना गरेको बताउँदै मनोजले अब रोकिएको अवार्डलाई निरन्तरता दिने बताए । यस्तै, लण्डनको ‘थर्ड आइ’ का सदस्य मध्येका एक अजय राइले अवार्डलाई भव्य बनाउन आफुहरुले कुनै कसर बाँकी नराख्ने बताए । उनले, अवार्ड स्क्यान्डल मुक्त होस् भन्ने कामना पनि समेत गरे । यस्तै, लण्डनबाट आएका संसरा मनी ट्रान्सफरका संचालक राजाराम गिरीले भने ‘बरु अवार्डका लागि समय लिनुहोस् । तर, नेपाली चलचित्रलाई मजबुत बनाएर लण्डनमा अवार्ड गर्दा राम्रो हुन्छ ।’

कार्यक्रममा चलचित्र निर्माता संघका अध्यक्ष आकाश अधिकारी, निर्माता केशव भट्टराई, नायक निखिल उप्रेती, सेन्सर बोर्ड सदस्य सन्दिप सापकोटा लगायतले अवार्ड सफलताको शुभकामना दिए । करिब १५ विधामा अवार्ड वितरण गर्ने तयारी गरेको मनोजले जानकारी दिएका छन् । मे महिनामा अवार्ड गर्ने तयारी नेपाल र लण्डन पक्षका आयोजकले गरेका छन् ।