कलाकार विष्णुभक्तको शवलाई श्रद्धाञ्जलीका लागि प्रज्ञामा राखिने

मंगलबार साँझ राष्ट्रिय नाचघर जमलमा ‘महर्षि याज्ञ बैल्क्य’ नाटक मञ्चन गर्दा गर्दै हृदयघातका कारण निधन भएका कलाकार विष्णुभक्त फुँयाललाई श्रद्धाञ्जलीका लागि आज (बुधबार) बिहान ११ बजेदेखि दिउँसो २ बजेसम्म प्रज्ञा प्रतिष्ठान कमलादिमा राखिने भएको छ । त्यसपछि प्रज्ञाबाट पशुपतिसम्म शव यात्रा गरिने नाटकका निर्देशक बद्री अधिकारीले जानकारी दिएका छन् ।

निर्देशक अधिकारीका अनुसार ७९ वर्षिय कलाकार फुँयालको पार्थिव शरीरलाई विधुतिय शव दाह गृहमा दाहसंस्कार गरिनेछ । ‘परिवारको चाहाना अनुसार नै यसो गर्न लागिएको हो’ निर्देशक अधिकारीले भने । स्व.फुँयालका तीन छोराहरु मध्ये कान्छा छोरा अमेरिकामा छन् भने दुई छोराहरु नेपालमा छन् । श्रीमतीको केही वर्ष पहिला निधन भैसकेको छ । पाँच दशक बढी समयदेखि फिल्म, टेलिफिल्म र रंगमञ्चमा सक्रिय कलाकार फुँयालको मंगलबार नाचघरमा ‘महर्षि याज्ञ बैल्क्य’ नामक नाटक मञ्चन गर्दै गर्दा हृदयघात हुन गएको थियो । उपचारको लागि विर अस्पताल पुर्याइएपनि उनलाई बचाउन सकिएको थिएन । अहिले उनको पार्थिव शरीरलाई टिचिङमा राखिएको छ । ‘तीतो सत्य’ मा ‘योर माइ लभ’ थेगोले दर्शकमाझ स्व.कलाकार फुँयाल चर्चित थिए ।