साम्राज्ञी र आकाशलाई लिएर ‘माला’ निर्माताको ‘तिमी सँग’

समिक्षात्मक रुपमा सफल मानिएको फिल्म ‘माला’ का निर्माता शिशिर राणाले नयाँ फिल्म ‘तिमी सँग’ निर्माणको घोषणा गरेका छन् । आफ्नै निर्देशन रहने फिल्ममा ‘ड्रिम्स’ हिरोइन साम्राज्ञीराज्य लक्ष्मी शाह र ‘म त तिम्रै हुँ’ का हिरो आकाश श्रेष्ठ मुख्य भूमिकामा प्रस्तुत हुनेछन् । भाईटिकाको दिन पारेर निर्देशक तथा निर्माता राणाले ‘तिमी सँग’ को पहिलो मुहार पनि सार्वजनिक गरेका छन् । फिल्मको पहिलो मुहारमा साम्राज्ञी र आकाश अनि बौद्धमार्गी बालबालिका प्रस्तुत छन् ।

निर्देशक तथा निर्माता राणाका अनुसार फिल्म ‘तिमी सँग’ एनआरएन पर्यटक र नेपाली गाईडबिचको प्रेममा आधारित हुनेछ । जसको शिर्ष भूमिकामा साम्राज्ञी र आकाश प्रस्तुत हुनेछन् । सुशिल क्षेत्रीको सिनेम्याटोग्राफी रहने फिल्मको छायाँकन काठमाण्डौं सहित पोखरा, घान्द्रुक, घान्द्रुक माथि पर्ने पोन्हिल र अन्नपूर्ण वेसक्याम्पमा हुनेछ । फिल्ममा संगीत राहुल मुमर्जीको छ । सुटिङ भने मंसिरदेखि सुरु गर्ने शिशिरको योजना छ । ‘ए मेरो हजुर २’ को छायाँकनमा व्यस्त रहेकी साम्राज्ञीको ‘तिमी सँग’ तेश्रो र आकाशको दोश्रो हो ।