१९७४ ए. डी. का भोकलिस्टले गाए ‘प्रेम गीत २’ मा

चलचित्र ‘प्रेम गीत २’ को शीर्ष गीतमा चर्चित ब्याण्ड १९७४ ए.डी. का भोकलिष्ट रोहित जंग क्षेत्रीले आवाज दिएका छन् । उनले नेपाली सिनेमाको लागि गीत गाएको यो पहिलो पटक हो । गीतमा आवाज रोहितको छ भने शब्द संगीत अर्जुन पोखरेलको रहेको छ ।

आसुसेन फिल्मस्को ब्यानरमा बन्ने चलचित्र ‘प्रेम गीत २’ को गीतले बजारमा राम्रै छाप छोड्नेमा गायक विश्वस्त देखिएका छन् । चलचित्र युनिटले यसपाली पनि चलचित्रको कभर कम्पिटिसनलाई निरन्तरता दिने जनाएको छ । कभर कम्पिटिसनको बिजेता एक जना महिला र एक जना पुरुषलाई जनही एक लाखका दरले नगद पुरस्कार प्रदान गर्ने र आसुसेन फिल्मसको ब्यनरमा बन्ने आगामी चलचित्रमा पाश्र्व गायनमा मौका दिने पनि घोषणा गरेको छ ।

गीत संगीतको कारणले गर्दा पनि चर्चामा रहेको ‘प्रेम गीत’ चलचित्रको नयाँ कोशेली ‘प्रेम गीत २’ मा पनि गीत संगीतलाई उच्च प्राथमिकतामा राखिएको निर्माताले जानकारी गराएका छन् । रोहित जंगको आवाजले सिनेमालाई बुष्ट गर्ने कुरामा निर्माता सन्तोस सेन आशावादी देखिएका छन् ।

चलचित्र ‘प्रेम गीत २’ मा प्रदिप खड्का र अश्लेषा ठकुरीको मुख्य भुमिका रहनेछ । चलचित्रलाई रामशरण पाठकले निर्देशन गर्नेछन् ।