अमिताभ र शाहरुलाई निर्देशन गर्ने शर्माले नेपाली फिल्म निर्देशन गर्ने

बलिउड फिल्म निर्देशक विवेक शर्माले नेपाली फिल्म निर्देशन गर्ने भएका छन् । निर्माता रोज राणासँगको सहकार्यमा शर्माले नेपाली फिल्म ‘मेरो पैसा खै’ नामक फिल्म निर्देशन गर्ने औपचारिक घोषणा मंगलबार साँझ गरियो । विवेश शर्मा तिनै निर्देशक हुन, जसले अमिताभ बच्चन र शाहरुख खान जस्ता सुपरस्टारलाई लिएर ‘भूतनाथ’ अनि ‘भूतनाथ रिटन्र्स’ जस्ता फिल्महरु निर्देशन गरेका छन् ।

बलिउडका सुपरस्टारलाई एक्सन कट गरेका निर्देशक विवेक शर्माले नेपाली फिल्म चाहिं कस्तो बनाउँलान् त ? यो प्रतिक्षाको विषय बनेको छ । उनले निर्देशन गरेका बलिउड फिल्महरु ‘कल किसने देखा’ र ‘बुद्धम शरणम गच्छामी’ प्रदर्शनको क्रममा छन् ।  निर्देशक शर्मा र निर्माता राणको फिल्म निर्माण कम्पनी रेदाअंश सिने आर्ट्सको साझेदारी रहने ‘मेरो पैसा खै’ नेपाली र हिन्दीसँगै, फ्रेञ्च, जर्मन, तामिल, अंग्रेजी लगायत विभिन्न एघार भाषा डविङ हुनेछ । निर्देशक शर्माले बताए अनुसार ‘मेरो पैसा खै’ कमेडी जनराको हुनेछ । व्यक्तिको जीवनमा पैसाले पार्ने प्रभावलाई रमाईलो तवरले फिल्ममा उतारिने निर्देशक शर्माले बताए ।

नेपाल र भारत दुवै देशमा छायाँकन हुने फिल्ममा कलाकार पनि दुवै देशका रहनेछन् । तर कलाकार भने पक्का भैसकेका छैनन् । फिल्मको द्धन्द्ध निर्देशन भने चन्द्र पन्तले गर्नेछन् । पछिल्लो समय प्रदर्शनमा आएको फिल्म ‘जय परशुराम’ का निर्माता तथा निर्देशकले राणाले हेभी बजेटमा फिल्म निर्माण हुने र फिल्म प्रदर्शन पनि दुवै मुलुकमा एकै साथ हुने बताए ।