के मलिनाले मेटाउलिन् फिल्ममा मिस नेपालको असफलता ?

दर्जनौं सुन्दरीहरुलाई उछिन्दै मिस नेपालको ताज पहिरिएका मिस नेपाल नेपाली फिल्म क्षेत्रमा भने स्थापित हुन सकेका छैनन् । भलै बलिउडका सुन्दरीले फिल्म क्षेत्र हाँकिरहेका छन् । बोल्ड लुक्स र अभिनय क्षमता भएकी सन् १९९७ की मिस नेपाल झरना बज्रचार्य फिल्ममा सफल हुन सकिनन् । उनी पछिका थुप्रै मिस नेपालले नेपाली फिल्ममा अभिनय गरे, तर ती सबै स्थापित नहुँदै विस्थापित हुन पुगे ।

यस्तैमा सन् २०११ की मिस नेपाल मलिना जोशीले पनि फिल्म ‘कलिउड’ को आइटम नृत्यबाट नेपाली फिल्ममा प्रवेश गरिन् । मलिना फिल्म ‘ऋतु’ बाट हिरोइन बनिन् । डेव्यु फिल्मको व्यापार उस्तो नभएपनि मलिनाको अभिनयको भने तारिफ थियो । उनै मलिनाले अभिनय गरेको दोश्रो फिल्म ‘झुम्की’ आजदेखि अल नेपाल रिलिज भएको छ । अपिल विष्ट निर्देशित फिल्ममा मलिना शिर्ष भूमिकामा प्रस्तुत भएकी छिन् । उनीसँगै फिल्ममा दयाहाङ राई, रिश्मा गुरुङ, मनोज आरसी लगायतको अभिनय रहेको छ । ट्रेलर हेर्नुस् :

फिल्म ‘संरक्षण’ को सुटिङ सकाएकी मलिना अर्को फिल्म ‘रानी’ मा पनि अनुबन्धित भएकी छिन् । फिल्ममा व्यस्त हुँदै गएकी मलिनाले यसअघिका मिस नेपालले पाएको असफलतालाई चिर्दै नेपाली फिल्ममा सफलता पाउलिन् त ?