सुदर्शनको ‘म यस्तो गीत गाउँछु’ मा पल र पूजाको जोडी

चर्चित मोडल तथा नायक पल शाह र ‘प्रेम गीत’ नायिका पूजा शर्माको जोडीलाई लिएर निर्देशक सुदर्शन थापाले फिल्म निर्माण गर्ने भएका छन् । सुदर्शनको निर्देशन तथा निर्माण रहने फिल्मको नाम ‘म यस्तो गीत गाउँछु’ जुराइएको छ । जुन शिर्षक सुदर्शनले नै निर्देशन गरेको सफल फिल्म ‘प्रेम गीत’ को शिर्ष गीतबाट सापटी लिइएको हो ।

शुक्रबार दुबईमा आयोजित एक समारोहमा सुदर्शनले ‘म यस्तो गीत गाउँछु’ निर्माण तथा निर्देशनको औपचारिक घोषणा गरेका हुन् । अर्जुन पोखरेलको संगीत रहने फिल्ममा दिनेश न्यौपानेले पटकथा तयार गर्दैछन् । कथा सुदर्शन स्वयमकै हो । पूजा र पलसँगै फिल्ममा अभिनेता सरोज खनाल अनि कलाकार नविण मानन्धरको अभिनय रहनेछ । फिल्मको छायाँकन तिहारपछि सुरु हुनेछ ।

नेपाली फिल्म क्षेत्रमा ‘मेरो एउटा साथी छ’ र ‘प्रेम गीत’ जस्ता गहिरो प्रेमको आभाष गराउने फिल्म दिएका सुदर्शनको नयाँ फिल्म ‘म यस्तो गीत गाउँछु’ पनि प्रेम कथा नै भन्ने फिल्म हो । धेरै प्रशंसकले पछ्याउने पल र ‘प्रेम गीत’ बाट दर्शकको मन जितेकी पूजाको क्यामेस्ट्री ‘म यस्तो गीत गाउँछु’ मा कस्तो होला ?