‘छक्का पञ्जा’ हेरेपछि रेखाले भनिन्, ‘फिल्मको हिरो दिपा दिदी’

नेपाली फिल्म क्षेत्रमा नायिका रेख थापालाई हिरोको रुपमा लिइन्छ । अभिनयसँगै फिल्म निर्माण तथा निर्देशनमा हात बढाएकी रेखाले प्रदर्शनरत फिल्म ‘छक्का पञ्जा’ हेरिसकेपछि भने निर्देशक दिपाश्री निरौलालाई हिरोको संज्ञा दिएकी छिन् ।

कमलपोखरीस्थित क्युएफएक्स कुमारी हलमा रातीको शो हेरेर बाहिरिदैं रेखाले भनिन्, ‘छक्का पञ्जाको एकमात्र हिरो भनेको दिपा दिदी हो । मलाई फिल्म एकदमै मन पर्यो ।’ आफ्नी आमासँग ‘छक्का पञ्जा हेर्न आएकी उनले थपिन्, ‘यसरी फिल्म हेरेर म कहिल्यै पनि हाँसेको थिइँन । दुई तीन ठाउँमा त मलाई रुन पनि मन लाग्यो । सबै कलाकारहरुले राम्रो अभिनय गर्नु भएको छ ।’ यस्तै उनले दिदी दिपालाई हरेक वर्ष आफैं फिल्म निर्देशन गर्न पनि सल्लाह दिइन् ।

दिपाश्रीको डेव्यु निर्देशन रहेको फिल्म ‘छक्का पञ्जा’ ले हलमा उत्साहपुर्वक दर्शकको साथ पाइरहेको छ । इन्द्र जात्राको दिन बिहिबार मात्रै यो फिल्मले क्युएफएक्स अन्तर्गतका हलहरुमा २३ शो संख्या पाएको छ । फिल्ममा दिपाराज गिरी, प्रियंका कार्की, शिवहरी पौडेल, केदार घिमिरे, जितु नेपाल, नम्रता सापकोटा, बर्षा राउत लगायतको अभिनय रहेको छ ।