नमज्जाको खबर : माइक्रोबस दुर्घटनामा आठ नेपाली सेनाको मृत्यु

त्रिशूली । काठमाडौँबाट अपराह्न १ बजे पश्चिमतर्फ त्रिशूली बजार जाँदै गरेको वा १ ज ७५८३ नंको माइक्रोबस मदानपुर गाविस–८, केउरिनीमा खस्दा बसमा रहेका आठ जना यात्रुको मृत्यु भएको छ ।

सडकबाट पाँच सय फिट तल खस्दा भएको सो दुर्घटनामा छ जना घाइते भएको नुवाकोटका प्रहरी नायब उपरीक्षक सिद्धिविक्रम शाहले जानकारी दिए । मृत्यु हुनेमा धेरैजसो त्रिशूली सैनिक तालिम केन्द्र, मैथलीमा तालिम लिइरहेका सैनिक जवान रहेको प्रहरीले जनाएको छ ।

यसैबीच दुर्घटनाका ८ मृतक मध्ये ५ जनाको सनाखत भएको छ। जिल्ला ट्राफिक प्रहरी कार्यालयका प्रहरी अर्जुन न्यौपानेका अनुसार दुर्घटनामा माइक्रोबसका चालक दामोदर कँडेल, सैनिक जवान यशोदा कार्की, इश्वर कार्की, पदम राई र सन्तोष बोगटीको मृत्यु भएको हो। अन्य तीन जनाको सनाखत हुन बाँकी छ।

दुर्घटनामा १५ जना घाइते छन् । घाईते सबैलाई उपचारका लागि काठमाडौं ल्याइएको छ। दुर्घटना लगत्तै सदरमुकाम बिदुरबाट जिल्ला प्रहरी कार्यालय नुवाकोटबाट एक टोली घटनास्थलमा पुगेको प्रहरी नायब उपरीक्षक सिद्धिबिक्रम शाहले बताए।