‘मोहर’को रोमान्टिक गीत सार्वजनिक

आगामी साउन २३ गतेबाट प्रदर्शनमा आउन लागेको नेपाली फिल्म **‘मोहर’**को पहिलो गीत ‘चाहिँदैन मोहर, पर्दैन सुकी’ सार्वजनिक भएको छ। काठमाडौँमा आयोजित एक पत्रकार सम्मेलनमार्फत सार्वजनिक गरिएको यस रोमान्टिक गीतमा शरद हुमागाँई र विशाखा शाहीको स्वर, प्रमोद ढुंगानाको शब्द र सुरेश अधिकारीको संगीत रहेको छ। पल शाह र नीति शाह फिचरिङ रहेको भिडियोमा उनीहरूको प्रेमिल केमेस्ट्री दर्शाइएको छ, जसमा रामजी लामिछानेको कोरियोग्राफीले थप रङ भरेको छ। गीत छायांकनको अनुभव स्मरण गर्दै पलले “मैले यो गीत गर्न सक्दिनँ भनेर भनेको थिएँ” भनेका थिए भने नीतिले गीतप्रति दर्शकको सकारात्मक प्रतिक्रियाको अपेक्षा राखेकी छन्।

ओम प्रतिकको लेखन र निर्देशनमा बनेको फिल्मले देउकी प्रथासँग जोडिएका सामाजिक सन्दर्भहरूसहित केही सस्पेन्सपुर्ण पक्षहरू उजागर गर्ने निर्देशकले बताएका छन्। चुम्बन जंग शाही निर्माता रहेको ‘मोहर’मा पल र नीतिसँगै अर्जुन जंग शाही, बेनिशा हमाल, मिथिला शर्मा, रविन्द्र झा लगायतका कलाकारको मुख्य भूमिका छ। फिल्म मेकर्स प्रा.लिको व्यानरमा निर्माण भएको यो फिल्मलाई रिच इन्टरटेन्मेन्ट, एफडी कम्पनी र एप्पल इन्टरटेन्मेन्टले वितरण गर्नेछ। गीतको लोकप्रियता र टिजरले पाएको प्रतिक्रियाले फिल्मप्रति दर्शकको चासो झनै बढाएको छ।