‘फ्रेन्डस् सिनेमाज्’को दोस्रो चेन अब बुटवलमा

बुटवलमा शुक्रबारदेखि नयाँ सिनेमा हल “फ्रेन्ड्स सिनेमाज” सञ्चालनमा आएको छ। अमरपथस्थित सिंह कम्प्लेक्समा रहेको यो हलमा २२२ सिटको क्षमता छ। धरानको फ्रेन्ड्स सिनेमाजको दोस्रो शाखाका रूपमा खुलेको यस हलमा फिल्म वितरणमा सक्रिय आशिष तामाङ, प्रदीप धामी र पुष्कर घिमिरेको लगानी रहेको छ।

हलको व्यवस्थापन रोयल सिने हब प्रालिले गर्नेछ। सञ्चालकहरूमध्ये एक आशिष तामाङका अनुसार, आधुनिक प्रविधि र सेवा सुविधासहितको नयाँ व्यवस्थापनका साथ हल सञ्चालनमा ल्याइएको हो। उद्घाटनको अवसरमा पहिलो हप्ताका लागि टिकट दर १५० रुपैयाँ मात्र राखिएको छ। बिहानको शो, मंगलबार र बुधबारका शोहरूमा टिकट दर अन्य दिनको तुलनामा कम हुने व्यवस्था गरिएको छ। हलमा दैनिक ६ शोसम्म प्रदर्शन गर्न सकिनेछ।

फिल्म वितरणमा समेत सक्रिय रहेको यो टिमले कुबेर सिने डिस्ट्रिब्युसनमार्फत ‘फर्की फर्की’, ‘खुस्मा’ र ‘१२ गाउँ’ जस्ता फिल्महरू दर्शकमाझ ल्याइसकेको छ। आगामी दिनमा ‘ऊनको स्वीटर’, ‘बलिदान’, र ‘रेशम फिरिरी’ जस्ता फिल्म प्रदर्शन गर्ने योजना रहेको छ। फ्रेन्ड्स सिनेमाजले देशका अन्य स्थानहरूमा पनि आफ्नो फ्रेन्चाइज विस्तार गर्ने लक्ष्य राखेको छ।