पुष्प खड्का बर्षौपछि आफू पढेको स्कुल पुग्दा

अभिनेता पुष्प खड्का लामो समयको अन्तरालपछि आफू पढेको स्कुल पुगेका छन् । मंगलबार पुष्पले पढेको स्कुलको वार्षिकोत्सवमा सहभागी भएका हुन् । कैलालीको श्री राष्ट्रिय नव जागुत उच्च माध्यमिक विद्यालयको ५४ औँ वार्षिकोत्सवको अवसर पारेर पुष्पलाई सम्मान समेत गरिएको हो ।

पुष्पलाई स्कुल प्रशासनले बाजा बजाएर स्वागत गरेको थियो । ‘पूर्व विद्यार्थी स्रष्टा सम्मान’ बाट सम्मानित हुन पाउँदा पुष्प भावुक र खुसी भए ।
पुष्पलाई मुख्यमन्त्री कमलबहादुर शाहले प्रमाणपत्रबाट सम्मान गरेका थिए । पुष्पले विद्यालयमा पुग्दा आफूले पुराना दिनहरू सम्झिएको बताए ।

नेपाली फिल्म क्षेत्रमा लागेपछि आफू विद्यालयमा खासै जान नपाएको भन्दै पुष्पले मंगलबार वार्षिकोत्सवको अवसरमा पुग्दा छुट्टै अनुभूति भएको सुनाए । पुष्पसँग तस्विर खिच्न विद्यार्थीदेखि अभिभावकहरूको भीड लागेको थियो ।