‘झिंगेदाउ’को ‘आगोबिना बिंडी जल्दैन’ गीत रिलिज

ज्ञानेन्द्र देउजा निर्देशित फिल्म ‘झिंगेदाउ’ को ‘आगोबिना बिंडी जल्दैन’ बोलको गीत रिलिज भएको छ । मंगलबार काठमाडौंमा एक कार्यक्रमको आयोजना गर्दै फिल्मको गीत सार्वजनिक गरिएको हो । सार्वजनिक गीतको भिडियोमा केकी अधिकारी, आँचल शर्मा, मुकुन भुसाल र कुशल विष्ट फिचर्ड प्रस्तुत छन् । रामजी लामीछानेको कोरियोग्राफी रहेको गीतको भिडियो निकै राम्रो बनेको छ ।

शान्तीश्री परियार र प्रविन बेड्वालको स्वर रहेको लोकलयको गीत मुक्त उदासले लेखेका हुन् । गीतमा अर्जुन पोखरेलको संगीत छ । स्वर्गीय साहित्यकार भीमनीधि तिवारीको कथा कृतिमा आधारित ‘झिंगेदाउ’लाई पुराना निर्देशक ज्ञानेन्द्र देउजाले निर्देशन गरेका हुन् ।

प्रदीप भारद्वाजको पटकथा रहेको चलचित्रको निर्मातामा सुलभ प्रतिक देउजा र समीक्षा देउजा छन् । कपनगढी सिनेमा र फिल्मक्रिउ नेपालको प्रस्तुति रहेको चलचित्रलाई विष्णु घिमिरे ‘कल्पित’ले छायाँकन तथा मित्र देव गुरुङले सम्पादन गरेका हुन् । भदौ १७ देखि चलचित्र प्रदर्शनमा आउँदैछ ।