‘कबड्डी ४’ को नयाँ रिलिज डेटः जेठ १३

बैशाख २३ गतेलाई प्रदर्शन मिति घोषणा गरेको फिल्म ‘कबड्डी ४’ दुई साता पछाडि सरेको छ । सरकारले आउँदो बैशाख ३० गते स्थानीय तहको चुनाव गर्ने घोषणा गरेपछि ‘कबड्डी ४’ दुई साता पछाडि सरेको हो । अब फिल्म आउँदो जेठ १३ गतेबाट अलनेपाल प्रदर्शनमा आउने एक पोस्टर सार्वजनिक गर्दै जानकारी गराइएको छ ।

रामबाबु गुरुङ निर्देशित फिल्ममा अभिनेता द्वय दयाहाङ राई र सौगात मल्ल अभिनेत्री मिरुना मगर प्रमुख भूमिकामा छन् । यो फिल्मलाई ‘कबड्डी’ को अन्तिम सिरिज भनिएको छ । यसैले फिल्मको उप–शिर्षक ‘द फाइनल म्याच’ राखिएको छ । फिल्मको कथा निर्देशक गरुङ र उपेन्द्र सुब्बाले लेखेका हुन् ।

बासुरी फिल्मस् र सुष्मा फिल्मस्को ब्यानरमा निर्माण भएको फिल्ममा बुद्धि तामाङ, विजय बराल, गौमाया यात्री, पुष्कर गुरुङ, कमलमणी नेपाल, कविता आले, जयनन्द लामा, प्रकाश घिमिरे, माओत्से गुरुङ, सारदा अधिकारी लगायतका कलाकारहरुको पनि अभिनय रहेको छ । शैलेन्द्र डि. कार्कीको छायांकन रहेको ‘कबड्डी ४’ मा कालीप्रसाद बाँस्कोटा र एसडी योगीको संगीत छ ।