‘सफर’ शोमा सञ्जयले नायिकालाई जुरुक्कै पारेपछि…
असोज १४ गते, शुक्रबारदेखि करिब ४५ हलबाट प्रदर्शनमा आएको फिल्म ‘सफर’ को बिहिबार साँझ प्रिमियर च्यारेटी गरिएको छ । एचआईभी संक्रमितको क्षेत्रमा सामाजिक कार्य गर्दै आइरहेको रोज फाउण्डेशनको सहयोगार्थ गरिएको च्यारेटी प्रिमियरमा निर्देशक आशिष श्रेष्ठ र नायक सञ्जय गुप्ता आकर्षकको केन्द्रमा परे ।
‘सफर’ को प्रिमियर च्यारेटी शो त्यतिबेला थप आकर्षित हुन गयो जतिबेला शोको पाहुना बनेर आएकी नायिका मरिस्का पोखरेललाई नायक सञ्जय गुप्ताले जुरुक्कै उचालेर फोटो खिचाए । सञ्जयले मरिस्कालाई बोकेको दृश्य निकै रमाइलो थियो । किन उचाले त सञ्जयले जुरुक्कै मरिस्कालाई ?
सम्भवतः सञ्चारकर्मी समेत रहेका सञ्जयलाई लागेको हुनुपर्छ यति भएपछि कसो गसिप नबन्ला ? उसो त सञ्चारकर्मी पनि ‘सफर’ को उक्त शोमा गसिप खोजिरहेका थिए, जुन सञ्जयले बुझेरै गसिपको माहोल बनाइदिए ।
जे होस्, अमेरिका बस्ने युवा पुस्ताको मनोविज्ञन र उनीहरुको रमाइलो यात्रालाई लिएर निर्माण गरिएको फिल्म ‘सफर’ लाई प्रिमियर च्यारेटी शोमा राम्रो प्रतिक्रिया मिलेको छ । केशव खड्काको लेखन तथा प्रस्तुती रहेको फिल्ममा सञ्जयसँगै मनन सापकोटा, शिविर पोखरेल र नुर्जा श्रेष्ठको मुख्य भूमिका रहेको छ ।
