‘छक्का पञ्जा’ को सफलतामा सिटिसीको सेलिव्रेसन
सुन्धारामा रहेको सिटिसी मलले फिल्म ‘छक्का पञ्जा’ सफलताको खुसीयाली साटेको छ । बुधबार फिल्मका कलाकाहरुलाई विशेष शो राख्दै सिटिसीले रात्री भोजन समेत गरायो । दोश्रो सातादेखि ‘छक्का पञ्जा’ लगाएको सिटिसीमा तेश्रो सातासम्म पनि दर्शकको चाप उच्च छ भने फिल्मले उक्त हलमा हालसम्मकै उच्च कलेक्सन गर्न सफल भएको छ ।
सिटिसी मलले राखेको ‘छक्का पञ्जा’ को खुसीयाली सेलिव्रेसनमा निर्देशक दिपाश्री निरौला, स्क्रिप्ट राईटर तथा अभिनेता दिपकराज गिरी, नायक आर्यन सिग्देल, नायिकाहरु नम्रता सापकोटा र बर्षा राउत तथा कलाकारहरु शिवहरी पौडेल, केदार घिमिरे ‘माग्ने बुढा’, बुद्धि तामाङ ‘हैट’, बसुन्धरा भूषाल, किरण केसी, अरुणा कार्की, वितरक गोपाल कायस्थ लगायत सहभागी थिए ।
दिपाश्री निरौलाको डेव्यु निर्देशन रहेको फिल्म ‘छक्का पञ्जा’ ले तेश्रो सातामा पनि दर्शकको साथ पाइरहेको छ । यो फिल्मले हालसम्म ८ करोड नजिकको व्यापार गरेको आँकलन छ । दशैंसम्म यही रफ्तारमा हलमा दर्शक आए ‘छक्का पञ्जा’ ले पन्ध्र करोडसम्मको ग्रस कलेक्सन गर्ने आँकलन छ, जुन कलेक्सन नेपाली फिल्म इतिहासमा सर्वाधिक हुनेछ ।
