‘छक्का पञ्जा’ हेर्दा हाँसेको हाँस्यै भए प्रधानसेनापती

प्रधानसेनापती राजेन्द्र क्षेत्रीले फिल्म ‘छक्का पञ्जा’ हेरेका छन् । दरबारमार्गस्थित क्युज सिनेमा हलमा उनले पाँच जनाको दलबल सहित आइतबार ‘छक्का पञ्जा’ हेरेका हुन् । दिपाश्री निरौला निर्देशित फिल्म हेरिरहंदा प्रधानसेनापती क्षेत्री हाँसेको हास्यैं गरेको कलाकार किरण केसीले बताए ।

कलाकार केसीले भने, ‘प्रधानसेनापती ज्यू त हाँसेको हाँस्यै हुनुभयो । उहाँलाई फिल्म धेरै नै मन पर्यो । उहाँले फिल्मको सबै टिमलाई बधाई पनि दिनुभयो ।’ प्रधानसेनापतिसँग कलाकार केसी, अर्का कलकार शिवहरी पौडेल र क्युज हलका सञ्चालक सुमित मैनालीले पनि फिल्म हेरेका थिए । तेश्रो सातामा प्रदर्शनरत फिल्म ‘छक्का पञ्जा’ लाई पुर्व तीन प्रधानमन्त्री झलनाथ खनाल, माधव कुमार नेपाल र केपी शर्मा ओलीले हेरिसकेका छन् ।

दिपाश्रीको डेव्यु निर्देशन रहेको फिल्म ‘छक्का पञ्जा’ मा दिपकराज, प्रियंका कार्की, शिवहरी पौडेल, केदार घिमिरे, जितु नेपाल, नम्रता सापकोटा र बर्षा राउतको अभिनय रहेको छ । प्रदर्शनको तेश्रो सातामा आउँदा पनि ‘छक्का पञ्जा’ हेर्न हलमा दर्शकको उत्तिकै घुइँचो छ ।