नाच्न नपाउँदा पलले पाएनन् अवार्ड !
हालसम्म सम्पन्न अवार्ड कार्यक्रममा नव नायकको अवार्ड उचाल्दै आएका पल शाहले आइतबार सम्पन्न एनएफडिसी चलचित्र पुरस्कार ०७२ मा भने खाली हात फर्किनु पर्यो । ‘होस्टेल रिटन्र्स’ बाट सुशिल सिटौलाले नव अभिनेताको अवार्ड उचाल्दा अवार्ड समारोहमा आश्चर्यता छायो । सम्पन्न दुई अवार्डमा नव अभिनेताको अवार्ड पाउँदै आएका पलले एनएफडिसी अवार्डमा चाहिं कि पाएनन् त ?
बुझिए अनुसार नृत्य प्रस्तुत नगरेपछि आयोजक समितिले पलको अवार्ड खोसेको हो । अवार्डको लागि पल र नायिका वर्षा राउतले केही दिन नृत्य रिहलसल्स गरेका थिए । तर, कार्यक्रमको सिलसिलामा दुवै जना दुबई जानु परेपछि उनीहरुले एनएफडिसी अवार्डमा आफ्नो प्रस्तुती दिन पाएनन् । यद्पी पल भने आइतबार नै दुबईबाट नेपाल ल्यान्ड भएर अवार्डमा सहभागी भएका थिए ।
तर, दुर्भाग्य आफ्नो अवार्ड अर्कैको पोल्टामा परेपछि पल अवार्ड समारोहमा निराश देखिए । उनका आँखामा आँसु छछल्किए । उसो त ‘होस्टेल रिटन्र्स’ का शुशिल सिटौला नव नायकको अवार्ड उचाल्न दाबेर नरहेको धेरैको ठम्याइ रह्यो । राम्रो अभिनय गरेपनि उनले ‘होस्टेल रिटन्र्स’ मा सिक्स प्याक हिरो सुशिल श्रेष्ठको साथीको भूमिका निभाएका छन् । तरपनि उनले कसरी पाए त अवार्ड ? एक फिल्कर्मीले प्याच्चै भनिदिए, ‘सबै सेटिङ !’
