सुटिङबाटै सस्पेन्स खोल्दै सविन !

नायक सविन श्रेष्ठ पहिलो पटक फिल्म निर्माणमा उत्रिएका छन् । रेखा थापालाई लिएर सविनले निर्माण गर्दै गरेको फिल्म ‘हिरो रिटन्र्स’ को यतिबेला हेटौंडामा छायाँकन चल्दैछ । चन्द्र गौतम निर्माता रहेको फिल्ममा रेखासँगै सविन र अर्का नायक दिल श्रेष्ठको पनि मुख्य भूमिका छ ।

पहिलो पटक फिल्म निर्माणमा उत्रिएका सविन फिल्मप्रति सस्पेन्स राख्न भने चुकेका छन् । सविन यस अर्थमा चुकेका छन् कि फिल्मका हरेक जसो दृश्यको तस्बिर सविनले सार्वजनिक गरिरहेका छन् । फिल्मको छायाँकन सुरु भएको दिनदेखि नै सविनको फिल्मको तस्बिरहरु सार्वजनिक हुँदै आइरहेका छन् । फिल्मको हिरो रेखा थापाले त सुटिङको भिडियो नै खिचेर आफ्नो फेसबुकमा हालेकी छिन् ।

फिल्म सुटिङका तस्बिर तथा भिडियो बारम्बार सार्वजनिक हुँदा फिल्मप्रति दर्शकको कौतुहलता कम हुन्छ भन्ने हेक्का सविनलाई नभएकै हो त ? अभिनेता सरोज खनाल नेगेटिभ भूमिकामा प्रस्तुत भएको फिल्मको छायाँकन केही दिनमै सकिनेछ । फिल्मलाई आशिष भेटवालले निर्देशन गर्दैछन् ।