दोश्रो सातामा ‘चपली हाईट २’ भन्दा ‘वीर विक्रम’ बलियो

दुई फिल्महरु ‘वीर विक्रम’ र ‘चपली हाईट २’ ले दोश्रो साताको प्रदर्शन यात्रा तय गरेका छन् । प्रदर्शनको दोश्रो सातासम्म आइपुग्दा यी दुई फिल्महरुको शो तथा हल संख्यामा तलमाथि हुन आएको छ ।

दोश्रो सातामा मल्टीस्टारर ‘वीर विक्रम’ ले मल्टीप्लेक्समा ‘चपली हाईट २’ शो संख्यामा उछिनेको छ भने मोफसलमा महानायक राजेश हमालको ‘सकुन्तला’ ले ‘चपली हाईट २’ लाई विस्थापित गरिदिएको छ । यता ‘वीर विक्रम’ ले भने एकल पर्दामा पनि पकड जमाइरहेको रिपोर्ट छ । यसअर्थ दोश्रो सातामा ‘चपली हाईट २’ भन्दा ‘वीर विक्रम’ बलियो देखिएको छ । प्रदर्शनको सुरुवातमा क्युएफएक्सका मल्टीप्लेक्समा ‘वीर विक्रम’ ले भन्दा ‘चपली हाईट २’ बढी शोज संख्या पाएको थियो । अहिले उक्त हलहरुमा दुई फिल्मको बराबरी शोज संख्या छ ।

मिलन चाम्सको निर्माण तथा निर्देशन रहेको फिल्म ‘वीर विक्रम’ मा दयाहाङ राई, दिया पुन, अर्पण थापा, अनुपविक्रम शाही, अर्पण थापा, नाजिर हुसेन लगायतको अभिनय रहेको छ । निर्माता तथा निर्देशक चाम्सले एक सातामा आफ्नो फिल्मले दुई करोड माथिको व्यापार गरेको दाबी गरेका छन् ।

यस्तै दिपेन्द्र के. खनालको निर्देशन रहेको फिल्म ‘चपली हाईट २’ मा नव नायक आयुष्मान जोशी, नायिका मरिस्का पोखरेल र नव नायिका परमिताराज्य लक्ष्मी राणाको मुख्य अभिनय रहेको छ । निर्माता अर्जुन कुमारले आफ्नो फिल्मको कलेक्सन एक करोड पुगेको दाबी केही दिन अगाडी नै गरेका थिए ।