पल शाह बन्ने भए ‘जोनी जेन्टलम्यान’ : आँचल शर्मा अपोजिटमा हुनेछिन्
विकास आचार्यको ‘नाईं नभन्नू ल ४’ बाट गत वर्ष रजतपटमा नायकको रुपमा डेव्यु भएका चर्चित मोडल पल शाह दोश्रो फिल्म ‘जोनी जेन्टलम्यान’ मा शिर्ष भूमिकामा प्रस्तुत हुने भएका छन् । नीतिन चन्दले निर्देशन गर्ने फिल्ममा पलको अपोजिटमा नायिका आँचल शर्मा प्रस्तुत हुनेछिन् । आँचल पनि ‘नार्इंं नभन्नू ल ४’ बाटै नायिकाको रुपमा डेव्यु भएकी हुन् ।
बुधबार राजधानीमा प्रेसमिट गर्दै ‘जोनी जेन्टलम्यान’ निर्माणको औपचारिक घोषणा गरिएको हो । पललाई नै लिएर थुप्रै म्युजिक भिडियो निर्देशन गरेका निर्देशक चन्दले फिल्म बारे भने, ‘लभ, रोमान्स र कमेडीलाई लिएर हामीले पृथक बनाउने कोशिस गर्ने छौं ।’ उनले पललाई यसअघिको फिल्ममा भन्दा फरक भूमिकामा प्रस्तुत गर्ने बताए । ‘६ महिना त हामीले पललाई मार्सलार्ट नै गराएका छौं’ उनले खुलाए, ‘जोनी कसरी जेन्टलम्यान हुन्छ त ? भन्ने फिल्मले देखाउँनेछ ।’
