निश्चल बस्नेतको निवासबाट ‘लुट २’ छायाँकन सुरु

फिल्म ‘लुट २’ को साउन १२ गते, बुधबारदेखि छायाँकन सुरु भएको छ । राजधानीको चण्डोलस्थित निर्देशक निश्चल बस्नेतको निवासबाट यो प्रतिक्षित फिल्मको छायाँकन सुरु भएको हो । छायाँकनको पहिलो दिन अभिनेता दयाहाङ राई र कलाकार सुशिलराज पाण्डेले सट दिदैंछन् ।

पैंतालिस दिन छायाँकन अवधी अनुमान गरिएको ‘लुट २’ को सम्पूर्ण छायाँकन राजधानीमै गरिनेछ । ब्लकबस्टर फिल्म ‘लुट’ कै क्यामेरापर्सन पुरुषोत्तम प्रधानले सिक्वेललाई खिच्दैछन् । फिल्ममा सौगात मल्ल, दयाहाङ, कर्म, सुशिलराज, ऋचा शर्मा, सृजना सुब्बा लगायत कलाकारको अभिनय रहनेछ ।

निर्देशक बस्नेतकै कथा तथा लेखन रहेको फिल्मले वर्तमान देशको अस्थिर अवस्थालाई व्याङ्ग्य हान्नेछ । माधव वाग्ले र नरेन्द्र महर्जनको संयुक्त निर्माण रहेको ‘लुट २’ फागुन १३ गते अल नेपाल प्रदर्शनमा आउनेछ । तस्बिरहरु : छायाँकार पुरुषोत्तम प्रधान र निर्माता अर्जुन कुमारको फेसबुकबाट ।