नेपाली फिल्म सिक्किम प्रदर्शनका लागि वोर्ड अध्यक्ष राईले गरे पहल
चौधो इनास अवार्ड सिक्किममा हुने घोषणा भए लगत्तै चलचित्र विकास वोर्डका अध्यक्ष राजकुमार राईले त्यहाँ नेपाली फिल्म प्रदर्शनको लागि पहल सुरु गरेका छन् । सिक्किम विकास वोर्डका अध्यक्ष तथा अभिनेता उत्तम प्रधानलाई मंगलबार आफ्नो कार्यालयमा स्वागत गर्दै अध्यक्ष राईले नेपाली फिल्मको बजार विस्तारका लागि पहल सुरु गरेका हुन् ।
‘त्यहाँ प्रवासी नेपालीहरु धेरै छन् । विदेशी फिल्मलाई कर पनि कम छ । चाँडै नै नेपाली फिल्मलाई त्यहाँ प्रदर्शन गर्न हामी सिक्किम सरकारसँग आग्रह गर्छौं ।’ तर, सिक्किममा सबै खाले फिल्मले प्रदर्शनको अवसर नपाउने अध्यक्ष राईले बताए । उनले भने, ‘विकास वोर्डले छनोट समिति गठन गरेर पठाउने छ । विकास वोर्ड सदस्य र अन्य फिल्म समिक्षकको पाँच जनाको समितिले कुन फिल्म पठाउने भन्ने निर्णय गर्नेछ ।’
यता ‘दर्पण छाँया’ अभिनेता तथा त्यहाँका विकास वोर्ड अध्यक्ष उत्तम प्रधानले पनि नेपाली फिल्म प्रदर्शनका लागि आफुले सक्दो पहल गर्ने बताए । जम्मा दुई वटा हल भएको भन्दै हिन्दी फिल्मको चापले गर्दा नेपाली फिल्मको प्रदर्शनमा केही समस्या आइरहेको उनले सुनाए । यता नेपालका इनास अध्यक्ष प्रकाश सुवेदीले अवार्ड अगाडी धेरै भन्दा धेरै नेपाली फिल्महरु रिलिज हुनु पर्ने माग राखे ।
