‘म त तिम्रै हुँ’ का नव जोडीले सम्झौता तोडेपछि…

अभिनेत्री सुस्मिता केसीले निर्माण गरेको फिल्म ‘म त तिम्रै हुँ’ मा नव कलाकार आकाश श्रेष्ठ र ज्योत्सना योगीले अभिनय गरेका छन् । यी नव नायक र नव नायिका मोडलिङ पृष्ठभूमिका हुन् । तर, ‘म त तिम्रै हुँ’ मा अभिनय गरेपछि फिल्म प्रदर्शनमा नआएसम्म म्युजिक भिडियोमा मोडलिङ नगर्ने सुस्मिताले उनीहरुसँ लिखित रुपमै सर्त राखेकी थिइन् ।

यो सर्तमा आकाश र ज्योत्सना दुवैले हस्ताक्षर गरेका थिए । तर, फिल्म प्रदर्शनको मुखमा आउँदा भने दुवैले सम्झौता तोड्दै म्युजिक भिडियो खेलेका छन्, जसले गर्दा सुस्मिता उनीहरुप्रति रिसाएको बताइन्छ । फिल्म आउनु अघि नै जोडी भिडियोमा देखिएपछि घाटा त अवश्य नै पर्छ ।

त्यसैले फिल्मको प्रचार प्रसारमा सुस्मिता आफैं दौडिरहेकी छिन् । नव नायकलाई केही मिडियामा पठाएकी सुस्मिताले नायिकालाई त प्रचार प्रसारमा प्रयोग गरेकै छैनन् । सुस्मिताको ‘म त तिम्रै हुँ’ साउन ७ गतेदेखि प्रदर्शनमा आउँदैछ । फिल्मका निर्देशक श्रीराम महत हुन् ।