सौगातले निर्देशन गर्ने ‘हैरान’ लाई चाहियो नयाँ प्रतिभा ‘बालिका’

विश्वका सबैभन्दा कान्छा निर्देशक सौगात विष्टले निर्देशन गर्ने दोश्रो फिल्म ‘हैरान’ मा मुख्य बाल कलाकार (बालिका) प्रतिस्पर्धा मार्फत छानिने भएको छ । सौगातले निर्देशन गरेको पहिलो फिल्म ‘लभ यू बाबा’ मा मुख्य भूमिकामा अभिनय गरेकी संगम विष्टको उमेर बढेपछि ‘हैरान’ नयाँ प्रतिभाको खोजी गरिएको हो ।

सौगातका पिता अर्थात नायक गजित विष्टले आठदेखि एघार वर्षकी बालिका ‘हैरान’ को लागि उचित हुने जानकारी दिंदै देशभरबाट त्यसको लागि अडिसन समेत लिइने बताए । अडिसनबाट छानिने उत्कृष्ट बालिकालाई एकाउन्न हजार रुपैयाँ प्रोत्साहन पुरस्कार समेत दिइने गजितले बताए । बालिका बाहेक फिल्ममा गजित स्वयम्, निश्मा घिमिरे, पुस्कर रेग्मी, सलोन बस्नेत, शिशिर भण्डारी, गायक सत्यराज आचार्य, निर्मल शर्मा, नारायण घिमिरे, ओसिन रजा र आँचल शर्मा पक्का भएका छन् ।

गम्भिर विष्टको लेखन तथा कोरियोग्राफी रहने फिल्मलाई दिव्यराज सुवेदीले खिच्नेछन् भने द्धन्द्ध निर्देशन चन्द्र पन्तको रहनेछ । फिल्मको छायाँकन भदौ महिनादेखि सुरु हुनेछ । ‘हैरान’ मा मोहनकृष्ण श्रेष्ठ, डा.वाइ लामा र सम्झना विष्टको संयुक्त लगानी रहेनछ ।

यस्तै फिल्म प्रचारलाई सहयोग पुग्ने हिसाबले ‘हैरान’ ले थप दुई प्रतिस्पर्धा पनि राखेको छ । चार देखि दश कक्षासम्मका विद्यार्थीहरुबिच चित्रकला प्रतियोगीता र वादविवाद प्रतियोगीता गराइने गजितले बताए । दुवै प्रतियोगीताका विजयीले एकाउन्न हजार रुपैयाँ नगद पुरस्कार पाउँनेछन् भने चित्रकला प्रतियोगीतका प्रथमले बनाएको चित्रलाई ‘हैरान’ को टाइटलमा पनि प्रयोग गरिनेछ ।

७ वर्षमा फिल्म ‘लभ यू बाबा’ निर्देशन गरेर गिनिज बुक अफ् दि वल्र्ड रेकर्डसमा नाम लेखाएका सौगातले कार्यक्रममा भने, ‘राम्रो फिल्म बनाउने विश्वास दिलाउन चाहान्छु ।’