९१ वर्ष लागे दिपाश्रीका कर्म पिता : जसले खेलेका छन् डेढ सय बढी टेलिफिल्म

कलाकार भिम बहादुर थापा ९१ वर्ष लागेका छन्, जो चर्चित हाँस्य व्याङ्ग्य कलाकार दीपाश्री निरौलाका कर्म पिता पनि हुन् । उनै दिपाले आफ्ना कर्म पिताको आज (असार १३ गते, सोमबार) जन्मदिन मनाइदिएकी छिन् ।

आफ्ना कर्म पिताको मैतिदेवी निवासमा पुगेर दिपाश्रीले माला लगाइदिइन् अनि उपहार दिइन । ‘जुठो परेर केक भने काट्न भएन’ दिपाले भनिन्, ‘प्रत्येक वर्ष म यसरी नै बुवाको घरमा आएर जन्मदिन मनाइदिन्छु ।’ कलाकार थापाले पनि दिपालाई आफ्नै छोरी सरह व्यवहार गर्छन् । उनी भन्छन्, ‘दिपा मेरो आफ्नै छोरी जस्तै हो ।’ उनकी वृद्धा श्रीमती पनि छिन् ।

जनचेतना मुलक टेलिफिल्म ‘देवी’ मा दिपाले कलाकार थापाको छोरी भएर अभिनय गरेकी थिइन भने दिपक र दिपाको हाँस्य व्याङ्ग्य टेलिफिल्मको पूरै भागमा पनि दिपाले छोरीकै भूमिका निभाएकी थिइन् । ८६ वटा फिल्ममा अभिनय गरेका उनले एक सय ६५ वटा त टेलिफिल्ममा मात्रै अभिनय गरेका छन् ।

७० भन्दा बढी विज्ञापनमा उनलाई देख्न सकिन्छ । हालसालै मात्रै उनले एक विज्ञापनमा अभिनय गरेका छन् । ९१ वर्ष लागेका कलाकार थापा उर्फ दिपाश्रीका कर्म पितालाई जन्मदिनसँगै स्वस्थ जीवनको शुभ कामना !