तुलसी घिमिरेले घोषणा गरे ‘दर्पण छायाँ २’ : के फर्किएला क्रेज ?

निर्देशक तुलसी घिमिरेले सुपरहिट फिल्म ‘दर्पण छायाँ’ को सिक्वेल निर्माणको औपचारिक घोषणा गरेका छन् । सोमबार राजधानीमा कार्यक्रम गर्दै नयाँ निर्माण टिम र नव कलाकारहरुलाई लिएर निर्देशक घिमिरेले ‘दर्पण छायाँ २’ निर्माण गर्ने औपचारिक घोषणा गरेका हुन् ।

निर्देशक घिमिरे स्वयमको लेखन रहेको ‘दर्पण छायाँ २’ मा नव कलाकारहरु पुष्पल खड्का, साहारा कार्की र श्रद्धा प्रसाईं मुख्य भूमिकामा प्रस्तुत हुनेछन् । प्रिक्वेलका निरुता सिंह, दीलिप रायमाझी र उत्तम प्रधान परिस्थिति अनि बाध्यताले गर्दा दोहोरिन नसकेको लेखक तथा निर्देशक घिमिरेले बताए । उनले भने, ‘नयाँ कथा र परिवेमा फिल्म बन्छ ।’

एक साता देखि ‘दर्पण छायाँ २’ को छायाँकन सुरु हुनेछ । डा.लोप्साङ लामाको प्रस्तुती रहने फिल्ममा सवु गदाल कार्की र रवि कार्की निर्माताको रुपमा रहनेछन् भने शिव ढकाल र रामेश्वर कार्की फिल्म छायाँकार हुन् ।

फिल्ममा संगीत रञ्जित गज्मेर र चन्दन लोम्जेलको रहेको छ । मूहर्त कार्यक्रममा पूजाआजा सहित कलाकारहरुले नृत्य पनि प्रस्तुत गरेका थिए । पछिल्लो फिल्म ‘दृष्टिकोण’ पछि ‘दर्पण छायाँ २’ निर्देशन गर्न लागेका निर्देशक घिमिरेको कार्यक्रममा सञ्चारकर्मी र फिल्मकर्मीको बाक्लो उपस्थिति रहेको थियो ।