अनमोल नेपाल फर्किएपछि ‘गाजलु’ लण्डन प्रिमियरमा छाए सृष्टि र रोहित

जेठ २८ गतेदेखि नेपाल प्रदर्शनमा आउने फिल्म ‘गाजलु’ को लण्डनमा भव्य प्रिमियर गरिएको छ । नायक अनमोल केसी प्रिमियर अगावै नेपाल फर्किएपछि त्यहाँको प्रिमियरमा निर्माता रोहित अधिकारी र नायिका सृष्टि आकर्षणको केन्द्रमा रहे ।

मंगलबार आयोजना गरिएको ‘गाजलु’ को लण्डन प्रिमियरमा नेपालबाट निर्माता अधिकारी, नायिका श्रेष्ठ र ओभरसिज डिस्ट्रीव्युटर प्रशान्त ताम्रकार गएका थिए । लण्डन प्रिमियरमा ‘गाजलु’ लाई राम्रो प्रतिक्रिया मिलेको निर्माता र नायिकाले बताएका छन् । दुवैले भने, ‘यहाँबाट पाएको प्रतिक्रियाले हामी खुसी छौं । नेपालमा पनि दर्शकलाई मन पर्छ भन्ने हामीलाई विश्वास छ ।’ उनीहरु बुधबार नेपाल फर्कदैछन् । नेपालमा पनि यसको भव्य प्रिमियर हुनेछ ।

हेमराज बिसी निर्देशित फिल्म ‘गाजलु’ पुर्व कुमारीसँगको प्रेम कथामा आधारित छ । फिल्ममा अनमोल र सृष्टिसँगै गौरव पहारी, सलोन बस्नेत, मेनुका प्रधान र रितिक शाहीको पनि अभिनय रहेको छ । फिल्मले सेन्सर वोर्डबाट युनिभर्सल प्रमाण पत्र पाएको छ । बैशाखदेखि जेठसम्म चलिरहेको असफल फिल्मको निरञ्तरतालाई ‘गाजलु’ ले रोक्ने फिल्म वृत्तमा चर्चा छ ।