जेठमा जारी छ निराशको व्यापार : दर्शक तान्न असफल ‘किन गरें माया’, ‘एक्सन’ र ‘बेस्ट फ्रेन्ज फरेभर’

शुक्रबारदेखि प्रदर्शनमा आएका तीन फिल्महरुले पनि निराशकै व्यापार गरेका छन् । ‘किन गरे माया’, ‘एक्सन’ र ‘बेस्ट फ्रेन्ज फरेभर’ ले गएको साता प्रदर्शनमा आएका ‘होमवर्क’ र ‘वुद्ध वर्न ईन नेपाल’ ले जतिपनि दर्शकलाई हलमा आकर्षण गर्न सकेनन् ।

उसो त ‘किन गरे माया’, ‘एक्सन’ र ‘बेस्ट फ्रेञ्ज फरेभर’ फिल्महरुको व्यापार उस्तो हुन्छ भन्ने अड्कल गरिएको थिएन । स्टार कास्टको अभाव, कमजोर प्रचार प्रसार र चलिआएको काम चलाउ कथावस्तुक कारण यी तीन फिल्महरुमा दर्शकको आकर्षण नभएको टिप्पणी फिल्म वृत्तमा छ ।

दिल कुमार प्यासीको निर्माण रहेको फिल्म ‘किन गरे माया’ प्रेम कथामा आधारित छ भने अभिनेता शिव श्रेष्ठ र नायिका जेनिशा केसी, प्रमोद दिप, कसम गुरुङ लगायतको अभिनय रहेको फिल्म ‘एक्सन’ एक्सन जनराको फिल्म हो । यस्तै नयाँ कलाकारलाई लिएर उत्सब थपलियाले निर्देशन गरेको फिल्म ‘बेस्ट फ्रेन्ज फरेभर’ प्लस टु पुस्ताको मित्रतामा आधारित छ ।

जेठमा प्रदर्शन भएका फिल्महरुले प्रचार प्रसारको खर्च पनि उठाउन नसक्ने व्यापार गरेको हलवाला बताउँछन् । जेठको अन्तिममा आउने ‘गाजलु’ लाई भने दर्शक हलमा तान्ने फिल्मको रुपमा हेरिएको छ । हेरौं यो फिल्मको व्यापार कस्तो हुन्छ ?