कुन चल्ला प्रेम, एक्सन कि मित्रता ? (फ्राईडे रिलिज)

यो शुक्रबारदेखि तीन फरक जनराका फिल्महरु प्रदर्शनमा आएका छन् । ‘किन गरे माया’, ‘एक्सन’ र ‘बेस्ट फ्रेन्ज फरेभर’ जेठ १४ देखि प्रदर्शनमा आएका फिल्महरु हुन् ।

दिल कुमार प्यासीले निर्माण गरेको फिल्म ‘किन गरे माया’ युवा प्रेम कथामा आधारित फिल्म हो । रमेश बोगटीले निर्देशन गरेको यो फिल्ममा नव युवा कलाकारहरुको अभिनय रहेको छ । आयुष रेग्मी, सञ्जु सिलवाल, सरु घलान लगायत कलाकाहरुले ‘किन गरे माया’ मा अभिनय गरेका छन् ।

यस्तै एक्सन अभिनेता शिव श्रेष्ठ अभिनित फिल्म ‘एक्सन’ नाम अनुसारकै एक्सन जनरामा आधारित छ । फिल्ममा शिव सँगै नायिका जेनिशा केसी, प्रमोद दिप, कसम गुरुङ लगायतको अभिनय रहेको छ । दिपेन्द्र कोइराला र सर्मिला तामाङ गुरुङले लगानीमा सहकार्य गरेका छन् ।

कलेज गोइङ पुस्ताको मित्रतालाई प्रस्तुत गरिएको फिल्म ‘बेस्ट फ्रेन्ज फरेभर’ लाई युवा निर्देशक उत्सब थपलियाले निर्देशन गरेका हुन् । फिल्ममा सौरभ चौधरी, मनिष न्यौपाने, सन्दिप घिमिरे, पिङ्की शेर्पा, साधना भण्डारी लगायतको अभिनय रहेको छ । अर्जुन पोखरेल, कमल खत्री र आकाश थापाले फिल्ममा संगीत दिएका छन् । ‘बेस्ट फ्रेन्ज फरेभर’ मा आरभ, सारिक्षा थापा र सन्दिप घिमिरेको संयुक्त लगानी रहेको छ ।

यी फिल्महरुमध्ये कसले दर्शकको मन जित्लान् ? आइतबारसम्म प्रतिक्षा गरौं ।