वोर्ड अध्यक्ष राईले सार्वजनिक गरे ‘लाल्टीन’ लुक्स : तर छैनन् दया र प्रियंका

फिल्म ‘लाल्टीन’ को पहिलो झलक सार्वजनिक गरिएको छ । बालुवाटारस्थित एक क्याफेमा चलचित्र विकास वोर्डका अध्यक्ष राजकुमार राईले भानु प्रताप प्रस्तुत फिल्मको ‘फस्ट लुक्स’ सार्वजनिक गरेका हुन् ।

सार्वजनिक ‘लाल्टीन’ को ‘फस्ट लुक्स’ मा काठमाण्डौं शहरमा एक व्यक्ति लाल्टीन झुण्ड्याएर उभिरहेका छन् । ती व्यक्ति को हुन्, अनुहार देखाइएको छैन । फिल्ममा भने दयाहाङ राई र प्रियंका कार्की मुख्य भूमिकामा प्रस्तुत भएका छन् ।

देवकुमार श्रेष्ठ निर्देशित फिल्म ‘लाल्टीन’ ले अध्याँरो भित्र उज्यालो खोज्ने काम गर्दछ । अनिम श्रेष्ठ र राज केसीको संयुक्त लगानी रहेको फिल्ममा दया र प्रियंकासँगै केकी अधिकारी, अर्जुन गुरुङ, रिया श्रेष्ठ, रामेश्वर वोगटी, जनक बर्तौला, मोहन विक्रम श्रेष्ठ, कमल आले, नविन शाह र नायक अर्जुनजंग शाही अनि नायिका मेलिना मानन्धरको विशेष भूमिका रहेको छ ।

हरी घले लामाको छायाँकन रहेको फिल्ममा रोशन श्रेष्ठको द्धन्द्ध निर्देशन रहेको छ भने विनोद ढकाल, किरण माइकल र डिजराज पौडेलको संगीत रहेको छ । फस्ट लुक्स रिलिज गरिएपनि ‘लाल्टीन’ को रिलिज डेट भने तय गरिएको छैन । बिहिबारको कार्यक्रममा व्यस्तताका कारण कुनै पनि मुख्य कलाकारहरु सहभागी थिएनन् ।