‘एभिन्युज पिक्चर्स’ को पाँच फिल्म एकैचोटी : रोजाईमा जीवन र केकी

एभिन्युज टेलिभिजन आफ्नो भगिनी संस्था ‘एभिन्युज पिक्चर्स’ मार्फत् फिल्म निर्माण गर्ने भएको छ । आइतबार दरबारमार्गस्थित अन्नपूर्ण होटलमा ‘एभिन्युज पिक्चर्स’ ले एकसाथ पाँच फिल्म निर्माणको घोषणा गरेको हो । फिल्म निर्माण गर्ने अर्को कम्पनी ‘अनन्या पिक्चर्स’ सँगको सहकार्यमा ‘एभिन्युज पिक्चर्स’ ले पाँच फिल्म निर्माण गर्ने भएको हो ।

‘एभिन्युज पिक्चर्स’ ले निर्माण गर्ने फिल्महरुको नामाकरण ‘रिँगटा’, ‘लामा लाः द मंक’, ‘जोसेफ’, ‘पाप पोखरी’ र ‘देवकोटा’ गरिएको छ । जसमध्ये ‘रिँगटा’ को निर्माण सम्पन्न भइसकेको छ भने ‘लामा लाः द मंक’ पोस्ट प्रोडक्सनमा छ । बाँकी तीन फिल्म निर्माणको क्रममा रहेको जानकारी गराइयो । पाँचवटै फिल्मलाई निश्चल पौडेलले लेखन तथा निर्देशन गर्नेछन ।
धर्म परिवर्तनको विषयमा बन्ने ‘जोसेफ’ मा नायिका केकी अधिकारी अनुबन्धित भएकी छन् भने लक्ष्मीप्रसाद देवकोटाको गोसाइँकुण्ड यात्रामा आधारित ‘देवकोटा’ मा नायक जीवन लुइँटेल देवकोटाको भूमिकामा प्रस्तुत हुनेछन् ।