४२ लागे माग्ने बुढा, ६क्का पञ्जाको सेटमै मनाए जन्मदिन

केदार घिमिरे अर्थात ‘माग्ने बुढा’को आज जन्मदिन हो । आजदेखि उनी ४२ बर्षमा लागेका छन् । चलचित्र ‘६क्का पञ्जा’को छायांकनमा ब्यस्त रहेका केदारले सुटिङ्ग स्पटमै जन्मदिन मनाएका छन् । चलचित्र युनिटका सबैले उनलाई चकलेट सहित जन्मदिनको शुभकामना दिए । केक भने दिउँसो काट्ने कार्यक्रम छ ।

जन्मदिनको दिन विहानै उठेर नुवाईधुवाई गरेर मन्दिर गएर पुजा गरि सुटिङ्गमा पुगेका माग्नेलाई सबैले जिस्क्याए, ‘आजचाहि माग्नेले विहानै नुहाएछ’ । सधै जिस्किईरहने केदार सुटिङ्गमा हुदाँ सधै जोक गरेर सबैलाई हसाँईरहन्छन् । २०५८ सालदेखि कलाकारीता शुरु गरेका केदारले शुरुमा ‘हिजो आजका कुरा’मा काम गरेका थिए ।

त्यसपछि ‘गीताञ्जली’, ‘तितो सत्य’, ‘लोकलहरी’, ‘जिरे खुर्सानी’ हुदै ‘मेरी बाँस्सै’मा काम गरेका हुन् । सबैभन्दा चर्चित भने उनी ‘मेरी बास्सै’को माग्ने बुढा नामक क्यारेक्टरबाट नै भए । यतिबेला युट्यब च्यानल र सिनेमामाको काममा ब्यस्त बनेका केदारले जन्मदिनसँगै कम्प्रमाईजमा काम नगर्ने संकल्प लिएको पनि बताए । सधै मेहनत गरेर काम गर्ने, दर्शकलाई निराश नपार्ने संकल्प लिएको पनि माग्ने बुढाले मज्जाको अनलाईनलाई बताए ।

मज्जाको अनलाईन तथा मज्जाको टिभी परिवारको तर्फबाट पनि केदार घिमिरे माग्ने बुढालाई जन्मदिनको लाखौं लाख शुभकामना ।