यो बर्ष चर्चा भएर पनि नचलेका ३ अभिनेत्री

हामीले आजबाट यो बर्षको समिक्षा सुरु गरेका छौ । यो महिनाको अन्त्यसम्म अब निरन्तर हामी कुनै न कुनै बिषयमा दैनिक रुपमा फिल्म क्षेत्रको समिक्षा गर्नेछौ ।

आज मज्जाको अनलाईनमा यो बर्ष धेरैले आशा गरेर पनि नचलेका ३ अभिनेत्रीको चर्चा गर्नेछौ । यो बर्षभरि ३ अभिनेत्रीको चर्चा त भयो, तर चलेनन् । हुनत, यो बर्ष रिलिज भएका ६७ फिल्ममा मुश्किलले १० वटाले लगानी उठाएका छन् । बाँकी ५० वटा फिल्म पूर्ण रुपमा असफल भएको देखिन्छ । यसैले ५० वटा फिल्म खेल्ने अभिनेत्री असफल भएको पक्का हो । तर, अघिल्ला बर्षमा चलेर यो बर्ष फिटिक्कै नचलेका ३ अभिनेत्रीलाई हेरौं ।

१. केकी अधिकारीः यो बर्ष अभिनेत्री केकी अधिकारी सर्वाधिक असफल बनिन् । केकीका लागि हुनत, फिल्म नगरी लक्की सावित भएकै छैन । केकी पनि आफूले सुपरहिटको अनुभव लिन नपाएको स्विकारछिन् । केकीको यो बर्ष ३ वटा फिल्म रिलिज भयो, तर असफल । पौष २५ गते प्रतिक्षित फिल्म ‘बागमती’ रिलिज भयो, पूर्ण रुपमा असफल । माघ १ गते फिल्म ‘फन्को’ रिलिज भयो, चलेन । केकीको नै मुख्य भूमिका रहेको फिल्म ‘भाग् सानी भाग्’ चैत्र ५ गतेदेखि चल्यो, तर उनलाई हेर्न दर्शक खासै आएनन् । लगातार ३ वटा फिल्म असफल बनेपनि केकी व्यस्त बनिन् तर चलिनन् ।

२. नीता ढुंगानाः यो बर्ष अभिनेत्री नीता ढुंगानालाई पनि लक लागेन । बर्षमा एउटा फिल्म हिट भैरहेको थियो नीताको । तर, यो बर्ष २ वटा फिल्म चलेन । ‘धुन’ त प्रचार नभएर चलेन । तर, फिल्म ‘फूलै फूलको मौसम तिमीलाई’ प्रचार भएर पनि पानी माग्न पाएन । नीताले यो फिल्मबाट ठूलो आशा गरेकी थिइन् । यो फिल्म नचलेपछि उनलाई ठूलो झट्का लाग्यो । अब, नीता करिअरको गम्भिर मोडमा छिन् ।

३. शिल्पा पोख्रेलः गतबर्ष २ वटा फिल्म हिट भएपछि चर्चामा आएकी शिल्पा पोख्रेल यो बर्ष पूर्ण रुपमा असफल बनिन् । शिल्पाले अभिनय गरेको एउटा मात्र फिल्म ‘फागू’ यो बर्ष चलेन । ‘शिल्पा आफ्नो दमले होइन, निर्माता छविराज ओझाको दमले चलेकी थिइन्’ भन्ने पुष्टी भयो । अर्को बर्ष शिल्पा छविकै ब्यानरमा बनेको फिल्म ‘किस्मत २’का साथ दर्शकमाझ आउनेछिन् । शिल्पा यो बर्ष फिल्म नचलेपनि बिहे र इन्गेजमेन्टको चर्चाले मिडियामा देखिइन् ।

केकी, नीता र शिल्पा नचलेपछि यो बर्ष हिट भएका अभिनेत्रीको सूचीमा भने खडेरी लागेको छ ।