फिल्म चलाउन मन्दिर, तर थाहा छैन दर्शकलाई

फिल्म आवेग यही चैत्र १२ गतेबाट चल्दैछ । तर, यो फिल्मको बारेमा दर्शकमा कुनै जानकारी नै छैन । फिल्म छायांकनको बेलामा निर्देशक बसन्त निरौलाले राम्रै चर्चा पाए । मिडियामा पनि फिल्मको बारेमा राम्रै समाचार आएको थियो । तर, अहिले चल्ने बेलामा हुनुपर्ने चर्चा नै छैन ।

निर्देशक निरौला फिल्मकी अभिनेत्री तथा श्रीमती पवित्रा आचार्यको साथमा चितवन पुगेका छन् । उनले फिल्मको लागि भन्दै भाकल गरेको तस्बिर पनि फेसबुकमा पोष्ट गरे ।

तर, प्रस्तुतकर्ता सूर्य कार्कीले प्रचारमा ध्यान नदिएका कारण आर्यन सिग्देल जस्ता स्टार अभिनित फिल्म विना हल्लाखल्ला नै हलमा लाग्दैछ । कुनै पनि फिल्म निर्माणको बेलामा खुबै दु:ख हुन्छ ।

तर, फिल्म रिलिजको समयमा फिल्मका निर्माता, निर्देशकले वेवास्ता गरिदिदा त्यो काम बेकारमा खेरा जान्छ । फिल्मकी अर्की अभिनेत्री अर्चना डेलाला नेपाल आएर पनि अष्ट्रेलिया फर्किसकेकी छिन् । तर, उनलाई पनि फिल्म प्रचारमा प्रयोग गर्न निर्माता, निर्देशकले जानेनन् ।