दीपा र रायमाझीलाई बर्ष व्यक्ति सम्मान

हरेक बिहिबार प्रकाशन हुँदै आएको फिल्म सम्बन्धी साप्ताहिक पत्रिका ‘फिल्मीखबर साप्ताहिक’ले आफ्नो सातौ बार्षिकोत्सव मनाएको छ । काठमाण्डौमा एक कार्यक्रमको आयोजनामा मन्त्री, कलाकारदेखि पत्रकारको उपस्थितीमा सातौ बार्षिकोत्सव सम्पन्न गरिएको हो ।

फिल्मीखबरले साप्ताहिकले गतबर्षदेखि सुरु गरेको बर्ष व्यक्ति सम्मान पुरुषतर्फ फिल्म परदेशीका निर्देशक नारायण रायमाझीलाई सम्मानित गरियो । उनलाई सम्मानपत्र सहित बर्ष व्यक्ति घोषित गरिएको हो । निर्देशक तथा गीतकार रायमाझीले आफूलाई यो सम्मानले अझ काम गर्न उत्साह थपिएको बताए । यस्तै, बर्ष व्यक्ति महिलातर्फ हाँस्य कलाकार दीपाश्री निरौलालाई सम्मानित गरियो । कार्यक्रमका प्रमुख अतिथी उपप्रधान तथा उर्जा मन्त्री टोपबहादुर रायमाझीले सम्मानित २ फिल्मकर्मीलाई सम्मान पत्र प्रदान गरे ।

कार्यक्रममा बोल्दै दीपाश्रीले सबैको सहयोगबाट आज आफू यो स्थानमा पुगेको बताइन् । दीपा अब फिल्म ‘६क्का पञ्जा’बाट निर्देशकको रुपमा डेब्यू पनि गर्दैछिन् । कार्यक्रममा ‘डी सिने अवार्ड’का सहयोगीहरुलाई मायाको चिनो पनि प्रदान गरियो ।

फिल्मीखबर साप्ताहिकका प्रधान सम्पादक शान्तिप्रियले ७ बर्षसम्म लगातार कुनै फिल्म सम्बन्धी पत्रिका प्रकाशित गर्नु आफैमा सफलता भएको बताए । कार्यक्रममा चलचित्र विकास बोर्डका अध्यक्ष राजकुमार राइले फिल्मीखबरले पारेका प्रभावको चर्चा गरेका थिए । कार्यक्रममा अभिनेता, अभिनेत्री, हाँस्य कलाकारदेखि फिल्म क्षेत्रका विभिन्न व्यक्तिहरुको उल्लेख्य उपस्थिती थियो ।