अनमोलको अगाडि बलिउड अभिनेत्री प्रियंका पनि टिकिनन्
कुनै बेला थियो, जतिबेला बलिउडमा नाम चलेका अभिनेता र अभिनेत्रीको फिल्म आउँदा नेपाली फिल्मकर्मी डराउथे । फिल्म लगाउन चाडपर्व र बिदा मात्र होइन बलिउडका ठूला फिल्म पनि हेर्नुपर्थ्यो । तर, अब समय बदलिएको छ ।
अब, नेपालका चल्तीका ब्यानर र स्टारहरुको फिल्म रिलिज हुदाँ बलिउड फिल्मले पानी नमाग्ने अवस्था सिर्जित भएको छ ।
आजबाट देशभरका ८० हलमा रिलिज भएको फिल्म ‘ड्रिम्स’ले यही कुरा प्रमाणित गरेको छ । उदाउँदा स्टार अनमोल केसीको मुख्य भूमिका रहेको र अभिनेता भूवन केसीले निर्देशन गरेको फिल्म ‘ड्रिम्स’ले बलिउड फिल्म ‘जय गंगाजल’लाई हलबाट निकालेको छ । काठमण्डौको गोपिकृष्ण हलको बिहानी शोमा अनमोलको यो फिल्म ४ वटा हलमा हाउसफूल भयो भने बलिउड अभिनेत्री प्रियंका चोपडा अभिनित फिल्म ‘जय गंगाजल’को शो नै भएन । यो फिल्म हेर्न हलमा दर्शक नगएपछि ‘ड्रिम्स’ एकलौटी चल्यो ।
यो बाहेक देशभरका ८० वटै हलमा फिल्मको व्यापार विहानैदेखि आक्रामक छ । मल्टिप्लेक्समा शुक्रबार २ बजेपछि दर्शकको चाप बढी हुन्छ । सिंगल थिएटरमा देशभर फिल्म हाउसफूल गएको वुझिएको छ ।
