सुर्के थैलीले राख्यो रेकर्ड, युट्युबमा ५० लाख पटक हेरियो भिडियो

चलचित्र ‘वडा नम्बर ६’ को चर्चित गीत ‘सुर्के थैली खै’ ले युट्युबमा कीर्तिमानी राखेको छ । नेपाली गीतसंगीतको क्षेत्रमा सबैभन्दा बढी पटक हेरिएको गीतको रुपमा सुर्के थैली पर्न गएको छ ।

साउन २१ गते यूट्युवमा अपलोड गरिएको वडा नम्बर ६ को यस गीतमा चलचित्रका मुख्य कलाकारहरुले कम्मर मर्काएको देख्न सकिन्छ । गीतमा दीपाश्री निरौला, प्रियंका कार्की, दयाहाङ राई, दीपकराज गिरी, केदार घिमिरे, सीताराम कट्टेल, जीतु नेपाल, रञ्जिता गुरुङ्ग लगायतले नाचेका छन् ।

शंकर विसीको नृत्य निर्देशन रहेको यो गीतमा आवाज भने राजनराज शिवाकोटी र अन्जु पन्तको रहेको छ । गीतमा शब्द संगीत राजनराज स्वयंको रहेको छ ।

शुर्के थैली हिट भएपछि संगीतकार राजनराजको ब्यस्तता पनि निकै बढेको छ । वडा नम्बर ६ युनिटकै अर्को प्रोजेक्ट ६क्का पन्जामा पनि उनी संगीतकारको रुपमा अनुबन्धित भईसकेका छन् ।

चलचित्र ६क्का पन्जा यही चैत ८ गतेदेखि फ्लोर ज्वाईन गर्नेछ । यो समुहको यसअघिका दुई चलचित्रहरु ‘६ एकान ६’ र ‘वडा नम्बर ६’ को क्रमश दिनेश डिसी र उज्जवल घिमिरेले निर्देशन गरेका थिए भने यसपटक निर्मात्री तथा कलाकार दिपाश्री निरौलाले नै निर्देशन गर्ने भएकी छिन् ।

अब हेर्न बाँकी यो छ कि ‘६क्का पन्जा’को गीतले पनि ‘वडा नम्बर ६’ को झै चर्चा कमाउला त ? त्यसको लागि भने केही समय कुर्नै पर्ला ।