‘बाहिर मन डुलाउदाँ झन्डै बर्बाद भए’ : दिलिप रायमाझी
मज्जाको अनलाईन समाचार, माघ २० गते मंगलबार
नायक दिलिप रायमाझीले चलचित्र ‘लोग्ने मान्छे’को आफ्नो भुमिका र उनको बास्तविक चरित्र उस्तै रहेको प्रतिक्रिया दिएका छन् । राजधानीमा सोमबार चलचित्रको बारेमा जानकारी गराउन आयोजना गरिएको पत्रकार भेटघाट कार्यक्रममा दिलिपले उनको जिवनको बारेमा धेरै कुराको खुलासा समेत गरे ।
केही बर्ष अघि बाहिर मन डुलाउँदा उनको घरबार नै झन्डै बिग्रिएको थियो रे । तर यतिबेला उनी आफु सुध्रिएको बताउँछन् । ‘अहिले म आफ्नै घर गृहस्थीमा ब्यस्त छु’, दिलिप भन्छन्, ‘बाहिर मन डुलाउदा झन्डै बर्बाद भएको थियो नि’ । बाहिर मन डुलाउनु घर परिवारलाई समय नदिनु आफ्नो जिन्दगीको ठुलो भुल भएको उनले सबै सञ्चारकर्मी समक्ष सुनाए । उनले आफु अब भ्रमबाट बाहिर निश्किएको भन्न समेत भ्याए । नबुझेर गरिएको गल्ती क्षम्य हुने उनको बुझाई छ ।
दर्जनौं हिट चलचित्र दिएका दिलिपले चलचित्र ‘लोग्ने मान्छे’बाट पनि निकै ठुलो आशा राखेका छन । ‘लय संग्रौला दाईसँग काम गर्दा निकै रमाईलो भयो’, उनले भने, ‘राम्रो कामबाट नतिजा पनि त राम्रै निस्कन्छ नि हैन र ?’ उनको भनाईमा नाम ‘लोग्ने मान्छे’ भएपनि यो चलचित्र नारी प्रधान चलचित्र हो। चलचित्रले आम नेपाली परिवारको कथा बोल्ने उनी सुनाउछन् ।
अबका दिनमा सेलेक्टिभ चलचित्रमा मात्र काम गर्ने सोच बनाएका रायमाझी ‘लोग्ने मान्छे’को कथाबस्तुले आफुलाई तानेकोले नै यो चलचित्रमा काम गरेको बताउछन् । माघ २३ गतेबाट प्रर्दशनमा आउन लागेको लय संग्रौला निर्देशित ‘लोग्ने मान्छे’मा दिपिलसँगै नन्दिता केसीको पनि मुख्य भुमिका रहेको छ । नन्दिताले चचित्रमा निकै राम्रो काम गरेको बताउदै दिलिपले भने, ‘नन्दिता इज बेष्ट’ । यता नन्दितले पनि दिलिपसँग काम गर्दा निकै रमाईलो भएको प्रतिक्रिया दिईन ।
