९ महिलालाई सम्मानित गर्दै ‘अझै पनि’ ले गर्यो स्व. निर्देशकको नाममा ट्रष्ट स्थापनाको घोषणा

मज्जाको अनलाईन समाचार, काठमाण्डौं, माघ १३–

आगामी फागुन १५ देखि सार्वजनिक प्रदशर्नमा आउने फिल्म ‘अझै पनि’ तथा फिल्म निर्माण कम्पनी ‘पुनम इन्टरटेन्मेण्ट’ ले विभिन्न क्षेत्र तथा व्यावसायमा सक्रिय ९ जना महिलालाई सम्मान गरेको छ ।

सुचना तथा सञ्चारमन्त्री डा.मिनेन्द्र रिजालको प्रमूख आतिथ्य र उर्जा मन्त्री राधा ज्ञवालीको बिशिष्ट आतिथ्यमा मंगलवार राजधानीमा कार्यक्रमको आयोजना गर्दै विभिन्न क्षेत्रमा सक्रिया महिलालाई खादा तथा सम्मान पत्रद्धारा सम्मान गरियो । नेपाली अभिनेत्री गौरी मल्ल, डा.सुदेष्णा श्रेष्ठ, फेसन डिजाइनर शैलजा अधिकारी, सुचना आयोगकी आयुक्त यशोदा तिम्सिना, शिक्षा तर्फ कुमुद भट्ट छतकौली, वातावरण तर्फ सरिता ज्ञवाली, ब्युटिसियन रश्मिला श्रेष्ठ, राजनीतितर्फ श्रृजना अधिकारी र बैंकिङर पवित्रा लिम्बुलाई सम्मान गरियो । सम्मानित व्यत्तित्वले फिल्म ‘अझै पनि’ लाई सफलताको शुभकामना व्यक्त गरे ।

सुचना तथा सञ्चारमन्त्री रिजालले चलचित्र ‘अझै पनि’ को प्रयास सम्मानयोग्य र महत्वपूर्ण रहेको बताए । त्यस्तै उर्जा मन्त्री राधा ज्ञवालीले महिला शसक्तीकरणको निम्ती फिल्मले चालेको कदम सकारात्मक रहेको बताउँदै हर समयमा आफ्नो सहयोग रहने बताईन् ।‘अझै पनि’ निर्माता पुनम गौतमले फिल्मले महिलाको कथा बोल्ने बताईन् । सम्मानको लागी महिलालाई नै रोज्नुको मुख्य कारण पनि फिल्म नारीप्रधान हुनु नै रहेको उनले खुलाइन् । हरेक क्षेत्रका महिला नेतृत्वकर्तालाई एउटै मञ्चमा उभ्याउँदा फिल्म क्षेत्रलाई पनि अन्य क्षेत्रको दृष्टिकोण जसरी नै प्रभावकारी बनाउन मद्दत र्पुयाउने उनको भनाई थियो ।

‘ट्रष्ट आलोक’ स्थापनाको घोषणा
सोही सम्मान कार्यक्रममा स्व.निर्देशक आलोक नेम्वाङ्को स्मृतीमा ‘ट्रष्ट आलोक’ घोषणा भएको छ । स्व. आलोककी आमा अध्यक्ष रहने गरी उक्त ट्रष्ट अघि बढ्ने निर्माता गौतमले बताईन् । उक्त ट्रष्टको संरक्षक पुनम इन्टरटेन्टमेण्ट रहनेछ । ट्रष्टको पहिलो कार्यक्रम पनि घोषणा गरिएको छ । केहि समय पश्चात नेपाली म्यूजिक भिडियोको इतिहासमै पहिलो भिडियो निर्देशक शम्भुजित बाँस्कोटालाई सम्मान गर्ने कार्यक्रम रहेको पुनम गौतमले बताईन् । करिव ८ सय म्यूजिक भिडियो निर्देशन गरेका आलोकले तीन फिल्म निर्देशन गरेका थिए । जसमध्ये ‘अझै पनि’ आलोक निर्देशित अन्तिम फिल्म हो ।

सुदर्शन थापा प्रोडक्शन र पुनम इन्टरटेन्मेण्टको ब्यानरमा पुनम गौतम र सुदर्शन थापाले निर्माण गरेको ‘अझै पनि’ आउँदो फागुन १५ गते सावर्जनिक प्रदर्शनमा आउँदैछ । यो फिल्ममा सुदर्शन थापा, पुूजा शर्मा, सुरक्षा पन्त, बिजय लामा, प्रमिला खनाल, बिपना धिमाल, मिथिला शर्मा, रामशरण पाठक, पुष्प खड्का, बिशाल ढुंगाना लगाएतका कलाकारहरुको अभिनय रहेको छ ।

रामशरण पाठकले लेखेको फिल्म ‘अझै पनि’ मा राजेश श्रेष्ठको छायांकन, प्रितम पाण्डेको सम्पादन रहेको छ । महेश खड्का, हरी लम्साल, राजनराज सिवाकोटी र सचिन सिंहको संगीत रहेको यो फिल्ममा अष्ट महर्जनले द्धन्द्ध निर्देशन गरेका छन् ।