झरेको कपाल, चाउरिएको गाला,.. ‘होमवर्क’ गर्ने आर्यनको चाला
मज्जाको अनलाईन समाचार, काठमाण्डौ, पुष २ गते, बुधबार
नायक आर्यन सिग्देलको यस्तो रुप सायद पहिले कसैले देखेको थिएन । चाउरिएको छाला, कपाल झरेर चिण्डे भएको तालु अनि बाँकी रहेको सेतो कपाल । हातमा प्लेकार्ड बोकेर, टुम्लेट र झोला भिरेको साच्चैको बुढो मान्छेको अवतारमा सबैका सामु देखा परे आर्यन । झट्ट हेर्दा कसैले उनलाई चिन्दै चिनेनन् । उनको यो अवतार निकै नौलो र रोचक लाग्यो । यो गेटअप उनले चलचित्र ‘होमवर्क’का लागि बनाएका हुन् ।
गोपीकृष्ण मुभिजले मंगलबार एनएफडिसी स्टुडियो बालाजुमा एक कार्यक्रमको आयोजना गरी चलचित्र निर्माणको घोषणा गरेको हो । निकै नौलो तरिकाले गरिएको चलचित्र निर्माण घोषणामा चलचित्रका कलाकारहरु आफ्नो भुमिका लेखिएको प्लेकार्ड बोकेर स्टेजमा पुगेका थिए । निरक पौडेलको निर्देशनमा बन्न लागेको ‘होमवर्क’मा आर्यनको साथमा नम्रता श्रेष्ठ र विजय लामा मुख्य भुमिकामा हुनेछन् । यसअघि निरकले ‘कुसुमे रुमाल २’ निर्देशन गरेका थिए । चलचित्र ‘होमवर्क’लाई पुरुषोत्तम प्रधानले खिच्नेछन भने संगीत ताराप्रकास लिम्बुको हुनेछ । चन्द्र पन्तको द्वन्द रहने यस चलचित्रमा कविराज गहतराजको कोरियोग्राफी रहने बताईएको छ । कृष्णहरी बरालको गीत, शिवम अधिकारीको पटकथा तथा निमा लामाको मेकअप रहनेछ चलचित्र ‘होमवर्कमा’ ।
त्यस्तै गोपीकृष्ण भुमिजले सन २०१५ भित्र आफ्नै र संयुक्त लगानीमा गरेर जम्मा सातवटा चलचित्र निर्माण गर्ने औपचारिक जानकारी पनि कार्यक्रममा गराईयो । जसमध्ये करिश्मा मानन्धरले गोपीकृष्ण मुभिजसँग मिलेर एउटा सिनेमा पनि बनाउन लागेकी छिन्, जसलाई सम्झना उप्रेती रौनियारले निर्देशन गर्नेछिन । त्यस्तै अन्यमा, रेशराज आचार्य निर्देशक रहने चलचित्रलाई भैरव सापकोटाले निर्माण गर्दैछन भने गणेशदेव पाण्डेले ‘सुनिता’ नामको फिल्ममा गोपीकृष्णसँग सहकार्य गर्नेछन् । भने, भर्खरै ‘सोल सिस्टर्स’बाट निर्मात्री बनेकी नम्रता श्रेष्ठले पनि गोपीकृष्णसँगको सहकार्यमा चलचित्र बनाउनेछिन् ।
त्यस्तै नीर शाहको चलचित्र ‘सेतो बाघ’सँगै गोपीकृष्णले फिल्म वितरणमा समेत कदम बढाएको छ । चलचित्र ‘सेतो बाघ’ चैत्र २७ गतेबाट प्रर्दशनमा आउदैछ । रात्रीभोज सहितको कार्यक्रममा सुचना तथा सञ्चारमन्त्री मिनेन्द्र रिजाल, चलचित्र क्षेत्रका बिशिष्ट ब्यक्तित्वहरुदेखि नयाँ कलाकारहरुसम्मको उपस्थिति रहेको थियो ।
