‘मिसिङ: केटी हराएको सूचना’को गीत ‘सपनीमा’ सार्वजनिक

आगामी माघ ११ गते रिलिज हुन लागेको बहुप्रतीक्षित फिल्म ‘मिसिङ: केटी हराएको सूचना’को गीत ‘सपनीमा’ सार्वजनिक भएको छ। ललितपुरको लबिम मलमा आयोजित एक विशेष समारोहमा यो गीत प्रस्तुत गरियो। इन्दिरा जोशी र करण परियारको स्वर, करुण थापाको शब्द र संगीतले गीतलाई झनै प्रभावशाली बनाएको छ। करुण थापा २० वर्षपछि यसै गीतमार्फत पाश्र्व गीत लेखनमा फर्किएका हुन्।

गीतमा फिल्मका प्रमुख कलाकार नाजिर हुसेन र सृष्टि श्रेष्ठलाई ग्रामीण परिवेशमा प्रस्तुत गरिएको छ। नाजिरले परिकल्पना गरेको घर र परिवारको भावनाबाट सुरु भएको यो गीतले उनीहरूको प्रेमिल क्षणलाई आकर्षक ढंगले प्रस्तुत गर्छ। सृष्टि र नाजिरको जोडीलाई गीतमा निकै सुहाएको देखिन्छ। कोरियोग्राफर रामजी लामिछानेले उनीहरूलाई डान्सिङ शैलीमा प्रस्तुत गरेका छन्, जसले गीतलाई झनै मनमोहक बनाएको छ।

कार्यक्रममा गायिका इन्दिराले फिल्मले तराईको पात्रलाई हिरोको रूपमा स्थापित गरेको भन्दै प्रशंसा गरिन्। गायक करण परियारले पाश्र्व गायनको सपना पूरा भएकोमा खुसी व्यक्त गरे। गीतकार करुण थापाले निर्देशक दीपेन्द्र गौचनसँगको मित्रताका कारण यो गीत लेखेको बताए।

फिल्मका निर्देशक दीपेन्द्र गौचनले ‘उजेली’ र ‘हाम्रो मुमिन’ जस्ता डकु-ड्रामा निर्देशन गरेका अनुभवी व्यक्तित्व हुन्। संगीतमा गहिरो रुचि भएकाले उनले कथा सुहाउँदा उत्कृष्ट गीत तयार पारिएको बताए।

ट्राई सिटी पिक्चर्सको ब्यानरमा निर्माण गरिएको यस फिल्ममा नाजिर, सृष्टिसँगै सञ्जय गुप्ता, रामनारायण ठाकुर, रिना रिमाल, र मदन ठाकुर लगायतका कलाकारहरूको अभिनय छ। अमितेष शाहले विशेष भूमिका निर्वाह गरेका छन्।

फिल्मको निर्माणमा नकिम उद्दिन कार्यकारी निर्माता छन्। संगीत, कोरियोग्राफी, र कथा सबै पक्षले फिल्मलाई उत्कृष्ट बनाउने प्रयास गरेका छन्। ओएसआर डिजिटल डिजिटल पार्टनर रहेको यस फिल्मलाई एप्पल इन्टरटेनमेन्ट, एफडी कम्पनी, र रिच इन्टरटेनमेन्टले वितरण गर्नेछन्। सपनीमा गीतले संगीत, गायन, र प्रस्तुतिमा नयाँ उचाइ पाएको छ। फिल्म र गीत दुबैले दर्शकहरूको मन जित्ने विश्वास लिइएको छ।