प्रकाश सपुतको बसन्त को छायाङ्कन सम्पन्न

गायक तथा अभिनेता प्रकाश सपुतको निर्देशनमा बनेको चलचित्र ‘बसन्त’ले ३८ दिनमा छायाङ्कन सम्पन्न गरेको छ। काठमाडौँमा बुधवार खिचिएको अन्तिम दृश्यसँगै फिल्म निर्माणको महत्वपूर्ण चरण पूरा भएको हो। प्रकाश सपुत आफ्नो निर्देशनमा पहिलो डेब्यु फिल्म निर्माण गर्न पाउँदा निकै उत्साहित छन्। उनले भने, “फिल्म निर्माणमा हाम्रो टिमले उच्च मेहनत गरेको छ, र हामीले सोचे जस्तै नतिजा प्राप्त हुनेछ भन्ने विश्वास छ।”

फिल्मले बागलुङ, काठमाडौँ, र तराईका विभिन्न स्थानमा छायाङ्कन गर्दै विपन्न विश्वकर्मा समुदायको एउटा युवकको लेखक बन्ने सपना र त्यसका लागि उनले गरेको संघर्षलाई केन्द्रबिन्दुमा राखेको छ। यो कथा केवल मनोरञ्जन मात्र नभई समाजको वास्तविकतासँग पनि प्रतिविम्बित हुने वाचा गर्दछ।

‘बसन्त’ को कथा, पटकथा र सङ्गीत स्वयं प्रकाश सपुतले लेखेका छन्। कलाकारहरूको सूचिमा प्रकाश सपुतसँगै स्वस्तिमा खड्का, प्रभात पाल ठकुरी, खड्क बहादुर पुन (खबपु), शिवांशी श्री, अनुप बराल, कमलमणि नेपाल र प्रकाश घिमिरेजस्ता प्रतिभाशाली नामहरू समावेश छन्।

चलचित्र ‘बसन्त’ चैते दसैँको अवसर पारेर चैत २२ गते प्रदर्शन हुने घोषणा गरिएको छ। सपुतले फिल्मलाई फरक शैलीमा तयार गरेको दाबी गर्दै यसले दर्शकहरूलाई नयाँ अनुभव दिने विश्वास व्यक्त गरेका छन्।