फिल्म ‘जुना’ आगामी माघ २५ गते रिलिज हुने

नेपालको समाजमा बाल विवाह र महिला हिंसा जस्ता समस्याहरूलाई निरुत्साहित गर्नका लागि निर्माण गरिएको फिल्म ‘जुना’ आगामी माघ २५ गते प्रदर्शनमा आउने भएको छ। यो फिल्म गोदावरी फिल्म प्रोडक्सन एण्ड रिसर्च सेन्टर प्रालिको ब्यानरमा निर्माण गरिएको हो।

निर्देशक जीवन सेञ्चुरीले ‘जुना’ लाई नेपाली समाजमा व्याप्त कुरीतिहरूको अन्त्य गर्ने उद्देश्यले तयार पारेका छन्। फिल्मले ‘बाल विवाह सामाजिक अपराध हो’ भन्ने सन्देश बोकेको छ। बाल विवाह, महिला हिंसा, अनमेल विवाह, बहुविवाह, बलात्कार, जबरजस्ती करणी र छाउपडी जस्ता कुप्रथाहरूलाई चिर्ने प्रयास यस फिल्मले गरेको छ। निर्देशक सेञ्चुरीले नेपाल सरकारको सन् २०३० सम्म बाल विवाह अन्त्य गर्ने लक्ष्यलाई फिल्मले समर्थन गर्ने बताए।

फिल्मको कथा राजबहादुर सानेले लेखेका छन्। बीबी अनुरागी र रमेश सेञ्चुरीको संगीत, जीवन सेञ्चुरी र भीमबहादुर पौडेलका शब्द, अनि अञ्जु पन्त, पूर्णकला बिसी र यदुराई लकान्द्रीको स्वरले फिल्मलाई संगीतमय बनाएको छ। छायांकनको जिम्मा रामेश्वर हुमागाईंले लिएका छन्।

यस फिल्ममा अस्मिता ढकाल, कृष्णप्रसाद धिताल, देशभक्त खनाल, रश्मी भट्ट, कमल बोहोरा, अस्मिता बस्नेत, खगेन्द्र न्यौपाने, विकास आनन्द, इन्द्र बिके र केशव अधिकारीको अभिनय छ। पर्वत जिल्लाको सालिजा ओख्रेनीमा छायांकन गरिएको यस फिल्मका निर्माता दीपकप्रसाद घिमिरे हुन्।

‘जुना’ लाई एप्पल इन्टरटेनमेन्ट, रिच इन्टरटेनमेन्ट र एफडी कम्पनीले वितरण गर्नेछन्। पूर्व राष्ट्रपति विद्यादेवी भण्डारी, राष्ट्रिय सभा र प्रतिनिधि सभाका सांसदहरू, विज्ञ, लेखक र समालोचकहरूले फिल्मको विशेष प्रदर्शनमा यसलाई हेरेर प्रशंसा गरेका छन्। फिल्मले समाजमा परिवर्तन ल्याउने उद्देश्य बोकेको हुँदा यसलाई ऐतिहासिक र विशिष्ट बनाइएको छ।