रेखा थापासँग कतारामा रहेका मजदुरले भने, ‘हामीलाई नेपालमै रोजगार देऊ’

हालै कतारमा सम्पन्न ‘धुर्मुस सुन्तली’ साँझमा नायिका रेखा थापा पनि सहभागी भएकी थिइन् । सामाजिक सेवा प्रदायक कार्यक्रमका लागि कतार गएकी रेखाले त्यहाँका नेपाली मजदुरहरुसँग पनि भेटघाट गरेकी छिन् । उक्त भेटलाई उनले २८ लाख बढी लाइक भएको फ्यान पेजबाट लाइभ गरेकी थिइन् ।

कतारको कारावासमा काम गर्ने झण्डै एक दर्जन नेपाली मजदुरहरुले नायिका थापासँग आफ्नो देशमा रोजगार नभएका कारण विदेशिन बाध्य भएको गुनासो पोखेका छन् । एक जना मजदुरले नेपाल सरकारसँग आग्रह गर्दै भनेका छन्, ‘देशमा काम पाए हामी बाह्र घण्टा पनि काम गर्न तयार छौं ।’ ती मजदुरले कतारमा तोके भन्दा बढी समय काम गर्नु परेको बाध्यता सुनाए ।

पछिल्ला केही बर्षदेखि सामाजिक कार्यमा सक्रिया नायिका थापाले भने देशमा छिट्टै रोजगारीको अवसर सृजना हुने र कुनै पनि नेपाली श्रम गर्न विदेश जानु नपर्ने आशा उनीहरु समक्ष बाँडिन् । विदेशी भूमिमा रहेका नेपाली मजदुरलाई आफ्नो ज्यानको ख्याल गर्न र स्वास्थ्यलाई हानी गर्ने पदार्थ सेवन नगर्न रेखाले सल्लाह दिइन् ।