खगेन्द्र नव जीवनका केन्दमा शिल्पाको ‘वृन्दावन’ : देखाइयो गीत र प्रोमो, खुवाइयो भोजन

फिल्म ‘वृन्दावन’ युनिटले जोरपाटीमा रहेको खगेन्द्र नवजीवन केन्द्रका अपाङगता भएका बालबालिका तथा महिलालाई भोजन गराउँदै आफ्नो फिल्मको गीत तथा प्रोमो देखाएको छ । शुक्रबार यो कार्यक्रम राखिएको थियो ।

फिल्मका निर्देशक राज बहादुर सानेले आफ्नो फिल्मको तर्फबाट सानो सामाजिक सेवा रहेको बताए । यस्तै निर्माता रुद्र कंडेलले पनि यसरी सामाजिक सेवामा जोडिन पाउँदा खुसी लागेको बताए । फिल्मका मुख्य पात्रहरु नायक किशोर खतिवडा र नायिका शिल्पा पोखरेल भने सहभागी भएनन् । निर्माताले व्यस्तता कारण उनीहरु सामाजिक कार्यमा सहभागी हुन नपाएको बताए ।

फिल्म टिमको तर्फबाट सह निर्माता कमल जिसी, छायाँकार दिव्यराज सुवेदी अनि संगीतकार दिपक शर्मा लगायत उपस्थित थिए । बाँदरको समेत अभिनय रहेको फिल्म ‘वृन्दावन’ भदौ १७ गतेदेखि प्रदर्शनमा आउँदैछ । तस्बिर : कमल प्रसाईं