‘६क्का पञ्जा’को ‘पुर्व पश्चिम रेल’ आयो, माया पायो (भिडियो हेर्नुस्)

बहुप्रतिक्षित चलचित्र ‘६क्का पञ्जा’को पहिलो गीत सार्वजनिक भएको छ । ‘पुर्व पश्चिम रेल’ बोलको यो गीत पनि यसअघि हिट भएको ‘सुर्के थैली खै’ झै हिट हुने प्रारम्भिक अनुमान लगाउन सकिन्छ । अञ्जु पन्त र संगीतकार राजनराज शिवाकोटीको जुगलबन्दीमा गीत निकै मिठो बनेको छ । दिपाश्री निरौला निर्देशित पहिलो चलचित्र ‘६क्का पञ्जा’को यो गीत युट्युब मार्फत सार्वजनिक भएको हो । गीत सार्वजनिक हुने वित्तिकै गीत हेरेर दर्शकहरुले निकै राम्रो प्रतिक्रिया दिएका छन् ।

यसअघि नै ‘सुर्के थैली’ हिट दिईसकेका राजनराज शिवाकोटीको संगीत रहेको ‘पुर्व पश्चिम रेल’लाई राजन इसानले संयोजन गरेका हुन् । गीतमा चलचित्रका मुख्य कलाकारहरु दिपकराज गिरी, प्रियंका कार्की, जितु नेपाल, केदार घिमिरे ‘माग्ने बुढा’, बुद्वि तामाङ्ग ‘हैट’, बर्षा शिवाकोटी, नम्रता सापकोटा, सुमन गिरी लगायतलाई देख्न सकिन्छ । यो समुहको अघिल्लो हिट ‘सुर्के थैली खै’ भन्दा यसपाली सेट, कोरियोग्राफी र ड्रेसमा बिषेश ध्यान दिईएको छ । गीतमा कविराज गहतराजको कोरियोग्राफी रहेको छ ।

आमा सरस्वती गीता देवी फिल्मस्को ब्यानरमा बनेको यो सिनेमालाई पुरुषोत्तम प्रधानले खिचेका हुन् । सिनेमा भदौ २४ गतेदेखि सार्वजनिक प्रर्दशनमा आँउदैछ ।