निखिल र नीताको ‘निर्भय’ मा पुर्व अर्थ मन्त्री डा.महतको निर्देशन !

नायक निखिल उप्रेती र नायिका नीता ढुङ्गाना फिचरिङ फिल्म ‘निर्भय’ निर्माणको औपचारिक घोषणा गरिएको छ । सोमबार राजधानीमा आयोजित एक कार्यक्रमका बीच मधुसुदन भट्टराईले निर्देशक गर्ने यो फिल्मको औपचारिक निर्माण घोषणासँगै मुहर्त पनि गरियो ।

निखिल र नीताको ‘मुहर्त सट’ लाई कांग्रेसमा नेता तथा पुर्व अर्थ मन्त्री डा. रामशरण महतले निर्देशन गरे । फिल्ममा रामचन्द्र अधिकारी, सुशिल पोखरेल, विकास चापागाईं, प्रज्वल गिरी, मनोज केसी, कृष्ण शिवाकोटी लगायतका कलाकारहरुको पनि अभिनय रहनेछ । ‘निर्भय’ को कथा चित्तबुझ्दो भएकै कारण आफु फिल्म खेल्न राजी भएको एक्सन स्टार उप्रेतीले प्रेसमिटमा बताए । यो फिल्ममा उनी एक राष्ट्रप्रेमी युवकको भुमिकामा निखिल प्रस्तुत हुनेछन् ।  यस्तै नायिका ढुंगानाले पहिलो पटक एक्सन स्टारसँग स्क्रिन सेयर गर्न पाएकोमा खूशी व्यक्त गर्दै जतिसक्दो राम्रो काम गर्ने बताइन् । नेपाली समाजमा दैनिक रुपमा जनताले देखिरहेको अनि भोगिरहेको कथालाई ‘निर्भय’ ले उठान गर्ने निर्देशक भट्टराईले खुलाए ।

ताराप्रकाश लिम्ब र अर्जुन पोखरेलको संगीत रहने फिल्ममा नृत्य रामजी लामिछानेको रहनेछ भने प्रोडक्शन डिजाईनरमा सुवास काफ्ले छन् । कार्यक्रममा कांग्रेस युवा नेता टेकराज पौडेल, उधोगपति बिमल केडिया, निर्देशक आकाश अधिकारी लगायतले शुभकामना मन्तव्य राखेका थिए ।  यहि जेठ महिनाको दोश्रो हप्ताबाट फ्लोरमा जाने ‘निर्भय’ प्रसिद्धी सिने आर्ट्सको पहिलो प्रस्तुतीमा निर्माण हुन लागेको हो भने लगानी देविप्रसाद पाण्डेको गर्न लागेका हुन् । पहिलो पटक फिल्ममा लगानी गर्न तयार पाण्डेले टिम राम्रो भएको भन्दै आफु सधैं व्यापारिक क्षेत्रमा रहेकोले त्यसैको निरन्तरता स्वरुप अबको पाटो फिल्म क्षेत्र रहेको बताए ।

फिल्म क्षेत्रसँग पहिलेदेखि नै नजिक रहेको भन्दै डेब्यू निर्माता पाण्डेले ‘निर्भय’ को सफलता पश्चात भोलीका दिनमा पनि नेपाली फिल्म क्षेत्रमा लगानीलाई निरन्तरता दिने बोले । ‘निर्भय’ लाई यम थापाले लेखेका हुन् । रामशरण उप्रेतीले खिच्ने फिल्मलाई २०७३ कै मंसिर महिनामा रिलिज गर्ने निर्माण युनिटको तयारी छ । फिल्ममा द्वन्द्व हिमाल केसीको रहनेछ ।