थाहा छ निखिल आएपछि छटपटिएका थिए विराज, अब हुनेछ भिडन्त
एकसाथ नेपाली फिल्म क्षेत्रबाट हराएका थिए सुपरस्टारद्धय निखिल उप्रेती र विराज भट्ट । तर, निखिल ५ बर्षपछि कमब्याक गर्दै गर्दा विराज भोजपुरी फिल्ममा नै व्यस्त थिए । निखिलले फिल्म ‘भैरव’ फिल्म बनाउने तयारी गर्दा अभिनेता विराज भट्ट पनि नेपाली फिल्ममा फर्कन चाहन्थे । 
जतिबेला यी दुई स्टार नेपाली फिल्ममा थिए, दुबै द्धन्द्धमा जमेका थिए । यसैले पनि यी दुइविच शितयुद्ध राम्रै थियो । निखिल फर्कने सुनेपछि विराज पनि फिल्म क्षेत्रमा फर्कने तयारी गर्दै थिए । यसका लागि विराजले विभिन्न निर्मातासँग भेटेर आफ्ना लागि फिल्म बनाउन आग्रह नगरेका होइनन् । केही दिन अगाडि फिल्म ‘पर्शुराम’को पत्रकार सम्मेलनमा विराजले आफू यसअगाडि नै फर्कन चाहेको तर विभिन्न कुरा नमिलेको बताएका थिए ।
निखिल आउने भएपछि विराज छटपटिएका थिए । तर, निखिल विराज भन्दा एक बर्ष अगाडि आएर हिट भैसकेका छन् । आउँदो बर्ष यी दुई सुपरस्टारका लागि पनि विशेष छ । किनकी, निखिलका कम्तीमा पनि ३ वटा फिल्म रिलिज हुनेछन् भने विराजको एउटा । साउनमा विराजको फिल्म रिलिज हुनेछ भने भदौमा निखिलको । दुबैको फिल्म व्यापारले फेरि एकपटक दुइको तुलना हुनेछ । यसैले यी दुइको बक्स अफिसमा एकैदिन भिडन्त नभएपनि व्यापारको भिडन्तले भने राम्रै अर्थ राख्नेछ ।
